Qazaqstandaǵy jerasty kózderi táýlik saıyn 43,2 mln tekshe metr sý bere alatyny anyqtaldy

ASTANA. KAZINFORM — Sý resýrstary jáne ırrıgatsııa mınıstrligi Jerasty sýlary departamentiniń dırektory Jaıyq Erikuly el aýmaǵynda paıdalanýǵa jaramdy 4803 jerasty sý kózi bar ekenin málim etti. 

— Qazaqstanda aýyz sý jáne tehnıkalyq sýmen jabdyqtaý, sýarý jáne basqa da maqsattar úshin paıdalanylatyn 4803 jerasty sý ken orny barlandy. Memlekettik balansta táýligine 43,2 mln tekshe metr (jylyna 15,7 tekshe shaqyrym) paıdalaný qory esepteldi. Onyń ishinde táýligine 1,5 mln tekshe metri ǵana paıdalanylady. Paıdalaný maqsatyna qaraı jiktesek, aýyz sýǵa jaramdy qor táýligine 21,2 mln tekshe metr, óndiristik-tehnıkalyq qajettilikterge jaramdy qor táýligine 19,6 mln tekshe metr sý bere alatyny barlandy, — dedi departament dırektory ortalyq kommýnıkatsııalar qyzmetinde ótken baspasóz máslıhatynda.

Aıtýynsha bul kóz tabıǵı jolmen qalpyna kelip otyrady.

— Bul qordyń bári tolyǵymen paıdalanýǵa daıyn jáne tabıǵı jolmen toltyrylyp otyrady, — dedi Jaıyq Erikuly.

Buǵan deıin Qazaqstannyń munaı eksportynda Italııanyń úlesi 42 paıyzdan asqanyn jazǵan edik.