Qazaqstandaǵy jekemenshik mektepterge 19 mlrd teńgege jýyq qarajat tólendi
ASTANA. KAZINFORM – OrtaBilim aqparattyq servısi Qazaqstannyń jeti óńirinde jekemenshik mektepter aldyndaǵy bereshekti óteýge múmkindik berdi. Bul týraly Qarjy mınıstrligi málim etti.
Vedomstvonyń dereginshe, búginge deıin Aqtóbe oblysynyń mektepteri 1,5 mlrd teńgeden astam, Mańǵystaý oblysy – 2 mlrd teńgeden astam, Shymkent – 6,7 mlrd teńgeden astam, sondaı-aq SQO, Túrkistan, ShQO jáne Pavlodar oblystaryndaǵy jekemenshik mektepter 4,8 mlrd teńgeden astam qarajat alǵan.
Bilim basqarmalary men mektepter arasyndaǵy qarjylandyrý jónindegi kelisimsharttar jalpy 60 mlrd teńgege jasalǵan. Bul – qazirdiń ózinde kelisilgen qarjy. Jalpy, jergilikti bıýdjetten jekemenshik bilim berý qyzmetterin qarjylandyrýǵa 79 mlrd teńge bólingen. Servıs saıtynda bıýdjettiń ıgerilýi, ótinimder, kelisimsharttalǵan jáne aktilengen somalar týraly tolyq statıstıka qoljetimdi.
Bereshekti eń aldymen tolyq óteýge jaqyndaǵan óńirlerdiń biri – Mańǵystaý oblysy.
Vedomstvo túsindirgendeı, óńirde 50-den astam jekemenshik mektep qarjylandyrýǵa ótinim berip, jalpy 4,6 mlrd teńgege kelisimshart jasasqan, bul tolyq bıýdjet kólemi. Qazirdiń ózinde mektepterge 2,1 mlrd teńge (qyrkúıek-qazan aılary úshin) tólengen, qalǵan qarajat jaqyn kúnderi aýdarylady.
Mańǵystaýdaǵy «ADVANTA.KZ LYCEUM» mektebiniń negizin qalaýshy Janna Toqbaeva OrtaBilim servısiniń jumysyna qatysty pikir bildirdi.
Onyń aıtýynsha, óńirdegi birqatar jekemenshik mektep birneshe aı boıy qarajat ala almaı, muǵalimderge jalaqy tóleýde qıyndyqqa tap bolǵan. Keıbir mektepter jaǵdaıdan shyǵý úshin nesıe alýǵa májbúr bolǵan.
«Qazir jaǵdaı túzeldi. Jańa servıske kelsek, maqtaýdan aýlaqpyn, biraq shynymen solaı, bári óte naqty, jyldam jáne ashyq. Qyzmet kórsetý ortalyǵy táýlik boıy qoldaý kórsetti. Óıtkeni bári jańa, suraqtar óte kóp boldy. «Aqparattyq-esep ortalyǵy» mamandary kún saıyn Zoom-konferentsııalar ótkizip, barlyq ahýaldy túsindirdi. Árıne, bastapqyda emotsııa kóp boldy, shaǵym da az bolǵan joq. Biraq júıege boı úıretken soń báriniń yńǵaıly ekeni baıqaldy. Buryn ótinimder qarjy ortalyǵy arqyly bir aı boıy qaralyp, kelisimsharttar men aktiler goszakup saıty arqyly óte baıaý júretin. Qazir «bir tereze» qaǵıdasy iske qosyldy, barlyq tekserý men qol qoıý bir servıstiń ishinde. Bul óte qolaıly ári eń bastysy ashyq», – dedi Janna Toqbaeva.
OrtaBilim dereginshe, Qazaqstandaǵy jekemenshik mektepter jalpy 72 mlrd teńgege ótinim bergen.
Al óńirler shamamen 80 mlrd teńge bólgen. Tek eki óńirde suranym bıýdjetten asyp tústi — Shymkent pen SQO. Mysaly, Shymkent bilim basqarmasy 14,5 mlrd teńge qarastyrsa, mektepterden 16,6 mlrd teńgege ótinim túsken. SQO-da da jaǵdaı osyǵan uqsas, mektepter 506 mln teńge, al bıýdjet 405 mln teńge bólgen.
Qarjy mınıstrligi servıstiń otandyq IT-kompanııa tarapynan ázirlengenin atap ótti.
Eske salaıyq, buǵan deıin jekemenshik mektepterdiń shotyna alǵashqy qarajat túse bastaǵany habarlanǵan bolatyn.