Qazaqstandaǵy jeke mektepterde oqý aqysy qansha
ASTANA. KAZINFORM – Jeke mektepterdegi oqý aqysyna birneshe faktor áser etedi. Tipti oqýshynyń qaı synypqa baratyny mańyzdy ról atqarady. Soǵan qaraı jyldyq oqý aqysyna mıllıondar jumsaýǵa týra keledi, dep habarlaıdy Kazinform agenttiginiń tilshisi.
Jeke mektepter oqý aqysyn ártúrli jolmen eseptep beredi. Keıbiri 9 aıdyń aqysyn birden aıtsa, endi biri aı saıynǵy tólemdi kórsetedi. Sonymen birge oqýǵa qabyldar kezde qosymsha tólem qarastyrylady. Ol shamamen 200-400 myń teńge bolady. Tamaqqa, úıirmege, qosymsha sabaqqa dep aqy suraıdy. ıAǵnı tek oqý aqysyna emes, qosymsha qajettilik shyǵynyna daıyn bolý kerek.
Elimiz boıynsha Qyzylorda qalasynda jeke mektep aqysy tómen. Munda aı saıyn 25 000 teńge tóleýge bolady. Keıbir mektepte oqy aqysy – 50 000 teńge.
Semeı men Tarazda oqý aqysy 40 000 teńgeden bastalady. Semeıdegi keıbir jeke mekteptiń qyzmeti aıyna – 110 000 teńge. Al Tarazda 200 000 teńgege deıin jetti. Eger bala 0 – 4 synyp aralyǵynda oqysy tańnan keshke deıin sol mektepte júredi, úı tapsyrmasyn da sonda oryndaıdy. Tańerteń oqý baǵdarlamasyna saı bilim alyp, tústen keıin úıirmelerine barady.
Kókshetaý qalasynda baǵa 53 000 teńgeden bastalady. Bul 5-6 synyp oqýshylaryna arnalǵan baǵa. Al mektep aldy daıarlyq tobyna 105 000 teńge, 1-4 synyp aralyǵyna 135 000 teńge.
Ortada Qostanaı qalasy tur. Munda jeke mektepterdegi oqý aqysy aıyna 65 000 teńgeden bastalyp, 270 000 teńgege deıin jetedi. Orta eseppen jylyna 2,5 mln teńgege deıin barady.
Oral qalasynda oqý aqysy 75 000 teńgeden bastalyp, 180 000 teńgege deıin jetti. Keıbir bilim ordasy balanyń úlgerimine qaraı jeńildik te beredi. Úzdikterdiń oqý aqysy – eń tómeni.
Ekibastuz qalasy da alysqa uzamady. Munda aı saıyn orta eseppen 80 000 – 90 000 teńge bolady. Al Atyraý men Qaraǵandyda oqý aqysy 80 000 teńgeden bastalady. Aqtóbe qalasynda oqý aqysy jylyna 90 000 teńge jáne odan joǵary. Bul 1-4 synyp oqýshylaryna arnalǵan qyzmet aqysy. Al 5-11 synyp oqýshylaryna odan 10 000 teńgege qymbat. Keıbir bilim ordasy aıyna orta eseppen 245 000 teńge alady.
Taldyqorǵan, Jezqazǵan men Almaty qalalarynda oqý aqysy 100 000 teńgeden bastalady. Taldyqorǵanda jeke mektep az jáne munda kóbine bastaýysh synyp oqýshylaryn ǵana oqytady. Sondaı-aq Jezqazǵan qalasynda da tańdaý az. Al Almaty qalasynda suranysqa qaraı usynys ázir. Keıbir mektepterde oqý aqysy aıyna 1,4 mln teńge bolady. Al negizgi ortasha baǵa – 200 000 – 400 000 teńge.
Odan keıingi orynda Shymkent qalasy tur. Munda oqý aqysy 110 000 teńgeden bastalyp, 330 000 teńgege jetti. Keıbir bilim ordasynda ata-analardyń ótinishi jeke qaralyp, túrli jeńildik usynady.
Petropavlda eń arzany aıyna 120 000 teńgege shyǵady. Bul tek 1-2 synyp oqýshylaryna arnalǵan baǵa. Óńirde jeke mektepti tabý qıyn.
Aqtaý qalasynda baǵa ózge. Mundaǵy jeke mektepterde oqý aqysy aıyna 150 000 teńgeden bastalady. Eń qoljetimdisi osy. Al keıbir halyqaralyq mektepterde baǵa 390 000 teńgege jetedi.
Pavlodar qalasynda 0-4 synyp oqýshylaryna arnalǵan jeke mekteptiń oqý aqysy – 170-230 myń teńge aralyǵynda. Qazaqstannyń basqa da qalalaryndaǵy sekildi munda da aldyn ala tólem tóleıdi, tamaqtaný aqysy taǵy bar.
Óskemen qalasyndaǵy jeke mektepterde oqý aqysy aıyna 250 000 teńgeden bastalady. Al keıbir mektepterdegi baǵa aıyna – 380 000 teńge. Jylyna kem degende 2,8 mln teńge jumsaıdy. Túrkistan qalasynda da baǵaǵa oqýshynyń synyby áser etedi. Baǵa keıbir mektepte aıyna 315 000 teńgege jetken.
Elimiz boıynsha eń joǵary baǵa Astana qalasynda tirkeldi. Munda aıyna kem degende 350 000 teńge jumsaıdy. Al ortasha deńgeıdegi bilim ordasy 500 000 teńge bolsa, halyqaralyq mektepter aıyna 1,4 mln teńge eseptep beredi.
Aıta keteıik, buǵan deıin Qazaqstandaǵy JOO-nyń oqý aqysy týraly bildik.
