Qazaqstandaǵy jańa standart áınek qaýipsizdigin qalaı arttyrady
ASTANA.KAZINFORM - 2025 jyly elimizde qurylys áınegine arnalǵan, úılerdiń, keńselerdiń jáne qoǵamdyq ǵımarattardyń qaýipsizdigine tikeleı áser etetin standarttar ázirlendi.
Bul kópqabatty qaýipsiz áınek óndirisin retteıtin QR ST ISO 12543-1-2025 jáne QR ST ISO 12543-2-2025 standarttary jaıly aıtylyp otyr. Qazirgi ýaqytta osy talaptar Batys Qazaqstan oblysy, Oral qalasyndaǵy kásiporynda qoldanylady.
Saýda jáne ıntegratsııa mınıstrliginen atap ótkendeı, atalǵan qujattar óndirýshiler men óńdeýshiler úshin biryńǵaı talaptardy engizedi. Olarda kópqabatty áınektiń quramy men negizgi sıpattamalary aıqyndalǵan.
Áınektiń beriktigi men qaýipsizdigine basty nazar aýdarylǵan. Mundaı buıymdar soqqyǵa tózimdi bolady jáne synǵan jaǵdaıda qaýipti synyqtar paıda bolmaıdy.
— Búgingi tańda standarttar — jaı formaldylyq emes, adamdardy qorǵaýdyń naqty quraly. Kópqabatty áınekke qoıylatyn talaptardy engizý ǵımarattardyń qaýipsizdigin arttyryp, jaraqat alý qaýpin tómendetedi. Bul qazaqstandyqtardyń ómir súrý sapasyna tikeleı áser etip, qurylys materıaldaryna degen senimdi qalyptastyrady, — dep atap ótti «QazStandart» RMK bas dırektory Málik Sáýlebaı.
Іs júzinde bul joǵary deńgeıli qorǵanyshty bildiredi. Turǵyn úıler men bıznes-ortalyqtarda áınek zaqymdanǵan kezde jaraqat alý qaýpin tómendetedi. Vıtrajdar, qasbetter, terezeler men araqabyrǵalar mehanıkalyq júktemeler men temperatýranyń aýytqýyna tózimdirek bolady.
Óndiristik tsıkl birneshe óńdeý kezeńderinen turady. Jaıpaq áınek shyńdaýdan, lamınatsııalaýdan, emaldaýdan jáne basqa da protsesterden ótedi. Sosyn atalǵan buıymnan beriktik pen qaýipsizdik sıpattamalary belgilengen shynypaketter men arnaıy buıymdar jasalady.
«StekloServıs» qazaqstandyq kompanııasy ózi úshin ázirlengen osy standarttar boıynsha ónimniń keń aýqymdy túrlerin shyǵarady. Olardyń qatarynda shyńdalǵan jáne otqa tózimdi áınek, soqqyǵa jáne oqqa tózimdi kópqabatty buıymdar, emaldanǵan jáne ıip qalyptalǵan konstrýktsııalar, sondaı-aq shynypaketter bar.
— Kópqabatty áınek «qaýipsiz syný» qaǵıdaty boıynsha jumys isteıdi: tipti qatty soqqy tıgen jaǵdaıda da synyqtar konstrýktsııanyń ishinde qalady. Bul ásirese qaýipsizdikke óte joǵary talaptar qoıylǵan qoǵamdyq ortalar men qasbettik konstrýktsııalar úshin mańyzdy, — dep túsindirdi «StekloServıs» kompanııasynyń mamany.
Óndiristik protsess ártúrli tıptegi jaıpaq áınektiń, negizinen «djambo» formatyndaǵy áınektiń jetkizilýinen bastalady. Budan ári materıal shyńdaý, lamınatsııalaý, emaldaý, ıip qalyptaý, shyny paketterdi qurastyrý jáne otqa tózimdi buıymdardy daıyndaý sııaqty óndiristik óńdeýden ótedi.
Sońǵy túpkilikti kezeńinde daıyn ónimge tańbalaý basylady jáne qaýipsiz tasymaldaýǵa jáne saqtaýǵa arnalǵan aǵash jáshikterge nemese pıramıda tárizdi arnaıy tireýishterge býyp-túıiledi. Standarttardy engizýden ónimniń sapasy jaqsartyp, qurylys materıaldaryna degen senim arttady dep kútiledi.
— Bul ishki naryq úshin de, eksport úshin de mańyzdy. Biryńǵaı talaptar otandyq óndirýshilerge halyqaralyq qaǵıdalar boıynsha jumys isteýge múmkindik beredi, olardyń naryqtaǵy pozıtsııasyn nyǵaıtady, — dep atap ótti Saýda jáne ıntegratsııa mınıstrliginen.
Jańa standarttardyń qazaqstandyqtarǵa da jaqsy jaǵynan áseri bolady. Óte berik ári qaýipsiz áınek konstrýktsııalary jaraqat alý qaýpin tómendetedi, adamdar úshin tynyshtyq pen senimdilikke toly ortada kúndelikti ómir súrýge múmkindik beredi.
Aıta keteıik, Qyzylorda oblystyq kórkemsýret galereıasynda Qazaqstan Sýretshiler odaǵynyń múshesi Dáýletbek Toıshybaevtyń «Oıan» atty kreatıvti kórmesi ótti. Onda kópshilik nazaryna soqqyly núktelik gravıýra ádisimen oryndalǵan kartınalar usynyldy.
Sýretshi sırek kezdesetin kórkemdik tehnıkany elimizge alǵash ret ákelip otyr. Jańa keskindeme óneriniń ereksheligi – kartına áınekti balǵamen syndyrý arqyly salynady. Kórmege osyndaı ádis arqyly dúnıege kelgen 20-ǵa jýyq týyndy qoıylyp, kórermen qaýymnyń oń baǵasyn aldy.
