Qazaqstandaǵy ushaqtarda ınternet qashan qosylady
ASTANA. KAZINFORM – QR Kólik vıtse-mınıstri Talǵat Lastaev otandyq áýe kompanııalarynyń ushaqtarynda ınternet qashan qosylatynyn aıtty.
- Bıyl elge jetkiziletin jańa ushaqtarda, ıaǵnı Dreamliner 787 áýe kemeleriniń bortynda ınternet bolady. Sondyqtan tıisti jumystar júrip jatyr, - dedi T. Lastaev Senatta tilshiler suraǵyna jaýap bere otyryp.
Osy oraıda ol jyldyń aıaǵynda nemese keler jyldyń basynda ushaqtarda ınternet qosylatynyn aıtty. Bul jańa ushaqtar ishki jáne syrtqy áýe reısterin oryndaıdy.
Buǵan deıin bıyl qazaqstandyqtar ushaq bortynda ınternetti paıdalana bastaıtynyn jazǵan edik. Qazaqstan aýmaǵynda Starlink salǵan gateway-stantsııalar arqyly spýtnıktik ınternet kórshiles elderge de qoljetimdi bolady. Mysaly, Tájikstanǵa trafık bıyl beriledi. Kelesi kezekte — Mońǵolııa men Qyrǵyzstan tur.