Qazaqstandaǵy túzeý mekemesinde jazasyn óteýshi 5000-nan astam kitap oqyǵan
QARAǴANDY. KAZINFORM - Shaıza Qurmanqajy esimdi sottalǵannyń oqıǵasy – qamaýda otyryp ta adamnyń óz ómirine jańasha kózqaras qalyptastyryp, qundylyqtaryn qaıta saralaı alatynyn kórsetetin aıqyn mysal, dep habarlaıdy Kazinform agenttigi.
Ýaqyt bir ornynda turǵandaı kórinetin ortada ol ózin damytýǵa basymdyq bergen. Túzeý mekemesine túskennen keıin tuıyqtalmaı, kerisinshe jeke damýǵa bet burǵan. Búginde ol tártipke baǵynyshty, jaýapkershiligi joǵary azamat retinde sıpattalady.
Shaıza óz-ózin bilim arqyly úzdksiz jetildirip tyrǵan. Jazasyn ótegen ýaqytynda ol 5 myńnan astam kitap oqyp, jan-jaqty dúnıetanym qalyptastyrǵan. Onyń qyzyǵýshylyǵy ǵylymı-tanymdyq ádebıetke, fılosofııaǵa jáne rýhanı muraǵa baǵyttalǵan. Sonyń ishinde Qara sózder eńbegine erekshe mán beredi.
— Kitap – men úshin úzdiksiz damýǵa degen múmkindik. Olar ómirimdi qaıta oı eleginen ótkizýge kómektesedi, ishki tártipti nyǵaıtady jáne qandaı adam bolǵym keletinin túsinýge jol ashady, — deıdi Shaıza Qurmanqajy.
Ol jıi qaıta oralatyn avtorlar qatarynda Muhtar Áýezov, Muqaǵalı Maqataev, Іlııas Esenberlın, Іlııas Jansúgirov, Júsipbek Aımaýytov jáne Sábıt Muqanov bar. Ol ásirese ózin-ózi damytýǵa, psıhologııaǵa jáne klassıkalyq ádebıetke qatysty eńbekterdi oqýǵa basymdyq beredi.
Qytaı azamaty bolǵanyna qaramastan, Shaıza qazaq mádenıeti men dástúrine qurmetpen qaraıtynyn jáne ózin osy ortaǵa jaqyn sezinetinin aıtady.
Sottalǵanǵa deıin ol kásipkerlikpen aınalysqan. Onyń aıtýynsha, bul tájirıbe bastamashyldyq pen derbestikke umtylys sııaqty qasıetterdi qalyptastyrǵan. Atalǵan qabiletterin ol qazir de damytýdy jalǵastyryp keledi.
Bul oqıǵa ótkennen góri, kúndelikti tańdaý týraly. Keıbireýler ózin-ózi joǵaltyp alatyn bolsa, ol bilim men ózin-ózi damytý arqyly óz jolyn taba bilgen.
Eske salsaq, Qazaqstan Qarýly Kúshterinde merzimdi qyzmet kezeńinde árbir áskerı qyzmetshi keminde bes kitap oqýy tıis degen jańa talap engizildi.
