Qazaqstandaǵy tsıfrlyq sheshimderge halyqaralyq uıymdar da qyzyǵýshylyq tanytyp otyr
ASTANA. KAZINFORM - Halyqaralyq jasandy ıntellekt ortalyǵy alem.ai-ge ESKATO BUU delegatsııasy keldi.
QR Jasandy ıntellekt jáne tsıfrlyq damý mınıstrligi baspasóz qyzmetiniń habarlaýynsha, delegatsııa quramyna Azııa-Tynyq muhıty óńiriniń 15 eliniń ókilderi kirdi. Olardyń qatarynda Bangladesh, Grýzııa, Úndistan, Qytaı, Maldıv araldary, Mońǵolııa, Nepal, Reseı, Taıland jáne Túrkııa elderi bar.
Qonaqtar ortalyqtyń ınfraqurylymymen jáne Qazaqstannyń jasandy ıntellekt salasyndaǵy sheshimderimen tanysty.
Sapar ESKATO BUU-nyń Tsıfrlyq sheshimder ortalyǵyn qurý jónindegi arnaıy jumys toby aıasynda uıymdastyryldy. Bul bastama 2024 jylǵy qyrkúıekte ótken Azııa-Tynyq muhıty mınıstrlik konferentsııasynda tsıfrlyq ınklıýzııa men transformatsııa taqyrybynda bastalǵan talqylaýlardyń jalǵasy boldy. Sol kezde Almaty qalasynda ESKATO BUU-nyń Óńirlik tsıfrlyq sheshimder ortalyǵyn qurý usynylǵan edi.
Mundaı halyqaralyq bastamalar Memleket basshysy aıqyndaǵan strategııalyq baǵytpen úndes. Bıyl el úshin tsıfrlyq damý tehnologııalardyń júıeli túrde engizilýi, ınfraqurylymnyń damýy, jasandy ıntellektiniń ekonomıka men memlekettik basqarýdaǵy qoldanylý aıasynyń keńeıýi sııaqty naqty qadamdarmen júzege asyp keledi.
Premer-mınıstrdiń orynbasary - QR Tsıfrlyq damý jáne jasandy ıntellekt mınıstri Jaslan Mádıev kezdesý barysynda Exponential Cluster tujyrymdamasyn jáne salany damytýǵa arnalǵan keshendi tásildi tanystyrdy.
- Biz jasandy ıntellektini ınstıtýtsıonaldyq negizden bastap esepteý ınfraqurylymy men kadr daıarlaýǵa deıingi birtutas ekojúıe retinde damytyp kelemiz. Bul tásil tehnologııalardy jasap qana qoımaı, olardy ekonomıkaǵa, memlekettik basqarýǵa jáne áleýmettik salaǵa engizýge múmkindik beredi. Negizgi mindet - AI-sheshimderdi aýqymdy deńgeıde taratyp, óńirlik deńgeıde tıimdi qoldaný. Biz halyqaralyq yntymaqtastyq aıasynda tájirıbe almasýǵa jáne birlesken bastamalardy damytýǵa ashyqpyz, - dedi Jaslan Mádıev.
Sapar barysynda delegatsııaǵa alem.ai ortalyǵynyń negizgi keńistikteri tanystyryldy.
Jasandy ıntellekt taqyrybymen tanysý Sıngýlıarlyq mýzeıden bastaldy. Munda AI evolıýtsııasy XVII ǵasyrdaǵy fılosofııalyq ıdeıalardan bastap zamanaýı neırojelilik jáne generatıvtik modelderge deıin kórsetilgen. Ekspozıtsııa ınteraktıvti aımaqtardy qamtıdy.
Jasandy ıntellektiniń tájirıbede qoldanylýy Smart City aımaǵynda usynyldy - qalalyq ınfraqurylymdy basqarý quraly retinde, onyń ishinde aqyldy mobıldik, energetıka jáne qoǵamdyq qaýipsizdik sheshimderi bar. 180° proektsııasy bar ımmersıvti AI Cinema kınoteatrynda delegatsııa Qazaqstandaǵy alǵashqy tehnologııalyq ıýnıkorny Higgsfield AI platformasynda jasalǵan kontentpen tanysty.
Sondaı-aq, GovTech sheshimderi, ǵarysh salasyndaǵy jobalar jáne USTEM Foundation ázirlemeleri usynyldy. Jasandy ıntellekt negizindegi gýmanoıd robottar men robottandyrylǵan júıeler naqty ýaqyt rejıminde túrli mindetterdi oryndaý múmkindigin kórsetildi.
Halyqaralyq naryqtarǵa baǵyttalǵan Astana Hub startaptaryna erekshe nazar aýdaryldy. Tanystyrylǵan bastamalar qatarynda: Weglobal AI - mektep psıhologtary men kásibı baǵdar mamandarynyń jumysyn ońtaılandyrýǵa arnalǵan platforma; NCSpeech - jasandy ıntellektini oqytýǵa arnalǵan sapaly derekter jıyntyǵyn qalyptastyrýǵa múmkindik beretin ortalyqtandyrylǵan AI-ınfraqurylym; AMAN - balalar qaýipsizdigine qatysty qaýipter týraly jedel habarlaý servısi; Armeta AI - qurylys jobalaryn saraptaý men kelisýdi avtomattandyratyn zııatkerlik platforma; WONK - mektepti basqarýǵa arnalǵan biryńǵaı AI-platforma.
Sapar halyqaralyq seriktesterdiń Qazaqstandaǵy tsıfrlyq sheshimderge degen joǵary qyzyǵýshylyǵyn jáne eldiń jasandy ıntellekt salasyndaǵy óńirlik yntymaqtastyq alańy retindegi áleýetin rastady.
Úndistan men Qazaqstan jasandy ıntellekt arqyly ınklıýzıvti ósimdi kúsheıtkeli otyrǵany týraly jazdyq.