Qazaqstandaǵy temirjol vokzaldarynyń kelbeti qalaı ózgeredi
ASTANA. KAZINFORM — Qazaqstanda 124 temirjol vokzaly jańǵyrtylyp jatyr. Kólik mınıstrliginiń málimetinshe, jumys tek ǵımarattardyń syrty men ishin jóndeýmen shektelmeıdi. Jańǵyrtý kezinde vokzaldar jolaýshylarǵa qaýipsiz ári yńǵaıly bolatyndaı etip jańartylady.
Vokzaldarda ne ózgeredi
Jańǵyrtý kezinde vokzaldar jolaýshylarǵa qaýipsiz ári yńǵaıly bolýy jáne sapaly qyzmet kórsetýi úshin qazirgi talaptarǵa saı jańartylady.
— Jańǵyrtý aıasynda vokzaldardyń qasbeti men ishki bóligi jańartylyp, zamanaýı kútý zaldary jabdyqtalady. Baǵyt-baǵdar kórsetetin belgiler, sanıtarlyq toraptar men jolaýshylarǵa qyzmet kórsetý oryndary jetildiriledi. Qozǵalysy shekteýli azamattarǵa kedergisiz orta qalyptastyrýǵa erekshe kóńil bólinedi. Ol úshin taktıldi baǵyttaý júıeleri, arnaıy beıimdelgen sanıtarlyq bólmeler jáne basqa da qajetti jaǵdaılar qarastyrylady, — dedi QR Kólik vıtse-mınıstri Jánibek Taıjanov.
Sonymen qatar ınjenerlik jeliler men jaryqtandyrý júıeleri jańartylyp, jolaýshylarǵa aqparat berýge arnalǵan jabdyqtar da zaman talabyna saı beıimdeledi. Vokzaldardaǵy qaýipsizdik sharalaryn kúsheıtý de kózdelgen.
Mınıstrliktiń túsindirýinshe, negizgi maqsat — vokzaldardyń syrtqy kelbetin jańartý ǵana emes, jolaýshylarǵa kórsetiletin qyzmet sapasyn da jaqsartý qolǵa alynyp otyr. Osylaısha, vokzaldar qaýipsiz ári qolaıly bolyp, barlyq jolaýshyǵa birdeı qoljetimdi bolýy tıis.
Temirjol vokzaldaryn jańartýǵa ne sebep boldy
Birneshe ondaǵan jyl buryn salynǵan vokzaldardy tekserý kezinde birqatar ortaq másele anyqtalǵan. Kóp jaǵdaıda ǵımarattar men ınjenerlik jeliler tozǵan, ishki josparlaý qazirgi talaptarǵa saı kelmeıdi, al keıbir bólmelerdi tıimdi paıdalaný múmkindigi shekteýli.
Budan bólek, birqatar vokzalda jolaýshylarǵa jol tabýdy jeńildetetin belgiler men aqparattyq júıelerdi jetildirý, qozǵalysy shekteýli azamattarǵa qolaıly jaǵdaı jasaý qajet bolǵan.
Degenmen barlyq vokzaldyń jaǵdaıy birdeı emes. Olardyń tehnıkalyq jaı-kúıine ǵımarattyń qashan salynǵany, qaı óńirde ornalasqany, vokzaldyń sanaty men jolaýshylar sany áser etedi.
— Ár vokzal boıynsha sheshim onyń tehnıkalyq jaǵdaıy men paıdalaný erekshelikterine qaraı jeke qabyldanady, — dedi vıtse-mınıstr.
Barlyq vokzaldyń sáýleti birdeı bola ma
124 vokzaldyń barlyǵyn bir úlgide jasaý josparlanbaǵan.
Kólik mınıstrliginiń málimetinshe, jańǵyrtylatyn nysandarǵa qaýipsizdik, qoljetimdilik, jolaýshylar qozǵalysyn uıymdastyrý, sanıtarlyq jaǵdaı men navıgatsııa boıynsha ortaq talaptar qoıylady. Al ǵımarattardyń sáýleti men ishki josparlanýy ártúrli bolýy múmkin.
Bul vokzaldyń sanatyna, tehnıkalyq jaǵdaıyna, jolaýshylar sanyna, ǵımarattyń ereksheligine jáne ornalasqan eldi mekenge baılanysty anyqtalady.
Demek, jańǵyrtylǵan vokzaldardyń barlyǵy syrttaı bir-birine uqsamaýy múmkin. Biraq qaýipsizdik, qyzmet sapasy men qoljetimdilikke qoıylatyn talap ortaq bolady.
Vokzaldar kóbirek jolaýshy qabyldaı ala ma
Jobalardy ázirleý kezinde qazirgi jolaýshylar sany ǵana emes, aldaǵy jyldardaǵy jolaýshylar aǵyny da eskeriledi.
— Ár nysannyń ereksheligine qaraı jolaýshylar qozǵalysyn tıimdi uıymdastyrý, kútý zaldarynyń aýmaǵyn ulǵaıtý nemese qolda bar oryndy tıimdi paıdalaný, kireberisterdi, kassalar men basqa da qyzmet kórsetý aımaqtaryn jetildirý qarastyrylǵan, — dedi Jánibek Taıjanov.
Osylaısha, jańǵyrtý vokzaldardyń kelbetin ózgertýmen shektelmeıdi. Jobalar bolashaqta jolaýshylar sany artqan jaǵdaıda olarǵa sapaly qyzmet kórsetýge múmkindik berýge tıis.
124 vokzaldy jańǵyrtýǵa qansha qarjy jumsalady
124 temirjol vokzalyn jańǵyrtýdyń jalpy quny ázirge naqtylanǵan joq.
Kólik mınıstrliginiń aıtýynsha, ár nysanǵa jumsalatyn qarjy kólemi jobalaý-smetalyq qujattama ázirlenip, memlekettik saraptamadan ótkennen keıin belgili bolady. Sondyqtan búkil baǵdarlamaǵa qajet qarajat pen qazirge deıin ıgerilgen qarjy kólemi jobalardyń daıyn bolýyna jáne iske asyrylýyna qaraı naqtylanyp otyrady.
Jańǵyrtý aıaqtalǵannan keıin vokzaldardyń qalypty jaǵdaıyn saqtaý jumystary qoldanystaǵy tártippen júrgiziledi. Injenerlik júıelerge, ǵımarattar men vokzal mańyndaǵy aýmaqtarǵa tehnıkalyq qyzmet kórsetilip, qajet bolǵan jaǵdaıda jóndeý jumystary júrgiziledi.
Buǵan deıin Qazaqstannyń 17 oblysynda 74 temirjol vokzalyn qaıta jańǵyrtý jumystary aıaqtalǵany habarlanǵan edi. Taǵy 34 nysandy tamyzdyń sońyna deıin, al 15 vokzaldy qyrkúıektiń sońyna deıin paıdalanýǵa berý josparlanyp otyr.
