Qazaqstandaǵy tájik qaýymy 100 paıyz qazaq tilin erkin meńgergen - Akbarjon Ismaılov

ASTANA. KAZINFORM – Elordada Alǵys aıtý kúnine oraı «Alǵys aıtý: dıalog jáne qoǵamdyq kelisim mádenıeti» taqyrybynda dóńgelek ústel uıymdastyryldy. Іs-shara barysynda qoǵamdyq kelisim, ultaralyq tatýlyq jáne azamattyq jaýapkershilik máseleleri talqylandy.

Osyǵan oraı Qazaqstan halqy Assambleıasy keńesiniń múshesi, Tájikterdiń respýblıkalyq etnomádenı ortalyǵynyń tóraǵasy Akbarjon Ismaılov KazInform agentigine pikir bildirip, eldegi ultaralyq tatýlyq pen memlekettik tilge qatysty oılaryn jetkizdi.

Onyń aıtýynsha, Alǵys aıtý kúni – tarıhı taǵdyr toǵystyrǵan etnostardyń ózara rızashylyǵyn bildiretin ári el birligin nyǵaıtatyn mańyzdy kún.

- Biz búgin Alǵys aıtý kúnin tek mereke retinde emes, eldigimizdi bekemdeıtin tereń taǵzym kúni retinde qarsy alamyz. Rızashylyq bildirý – ótkenniń ónegesin ulyqtap, búgingi beıbitshiliktiń qadirin bilý. Qazaq jeri – talaı taǵdyrdy toǵystyrǵan, talaı ultqa saıa bolǵan kıeli meken. Tarıhtyń almaǵaıyp zamanynda taǵdyr talqysymen osy ólkege taban tiregen ata-babalarymyz qazaq halqynyń keńdigi men baýyrmaldyǵyn keńinen sezine bildi. Ózi de qıyndyq qyspaǵynda júrse de, kelgendi jatsynbaı, bir úzim nandy bólip jeý – tek tekti halyqtyń ǵana qolynan keletin erlik dep bilemin. Bizdiń babalarymyz bul jerden pana taýyp qana qoıǵan joq, olar osy topyraqqa tamyr jaıyp, naǵyz Otanyn tapty, – dedi spıker.

Sondaı-aq ol el birliginiń mańyzyn atap ótti.

- Halyq qaharmany, elimizdiń dańqty batyry Baýyrjan Momyshuly «Bólingendi bóri jeıdi, birligi joq el tozady» dep beker aıtpaǵan. Dostyq pen tatýlyq – Qazaqstannyń álem aldyndaǵy eń basty baılyǵy. Búginde bizdiń Egemen elimiz – bir shańyraq astynda júzden astam ult pen ulystyń mádenıetin, saltyn, tilin gúldetip otyrǵan teńdessiz memleket. Osy oraıda, elimizdegi tájik etnosynyń 100 paıyzy memlekettik tildi – qazaq tilin erkin meńgergenin zor maqtanyshpen aıtamyz. Bul – bizdiń qasıetti qara shańyraqqa, qazaq rýhyna degen eń joǵary qurmetimiz ben adaldyǵymyzdyń belgisi, – dedi ol.

Spıkerdiń sózinshe, qoǵamdyq kelisimdi saqtaý – barsha azamattyń ortaq mindeti.

- Birlik bolmaı, tirlik bolmas – bul bizdiń babalardan qalǵan buljymas qaǵıdamyz. Búgingi berekeli birligimiz – tek izgi tilekterdiń jemisi emes, ol tarıhtyń tezinen ótken, qıyndyqta shyńdalǵan eń asyl qazynamyz. Osynaý baǵa jetpes baılyǵymyzdy erteńgi kúnniń syn-qaterlerinen qorǵaý úshin bizge búgin myzǵymas quqyqtyq irgetas qajet. Sondyqtan 15 naýryzda ótetin respýblıkalyq referendým – bizdiń birligimizdi zańmen shegelep, eldigimizdi bekemdeıtin tarıhı tańdaý sáti. Bul – tek daýys berý emes, bul – urpaq aldyndaǵy jaýapkershilik pen ortaq bolashaǵymyzǵa degen adaldyq anty. El taǵdyry sheshiler shaqta judyryqtaı jumylyp, birligimizdi ispen dáleldeý — bárimizge ortaq qasıetti paryz, – dep túıindedi Akbarjon Ismaılov.

Aıta keteıik, Alǵys aıtý kúnine oraı astanalyq oqýshylar erekshe chellendj uıymdastyrdy.