Qazaqstandaǵy tasqyn aýqymy jahandyq jylyný úderisimen tikeleı baılanysty - Prezıdent

ASTANA. KAZINFORM – Prezıdent Qasym-Jomart Toqaev Shanhaı Yntymaqtastyq Uıymynyń sammıti aıasynda ótip jatqan «ShYU+» kezdesýinde elde ótken tasqyndardyń aýqymyna jahandyq jylyný úrdisi eleýli áser etkenin aıtty.

Jıyn kezinde Memleket basshysy klımattyń ózgerýi búkil álem úshin ózekti máselege aınalǵanyn aıta kelip, onyń jaǵymsyz áserin Qazaqstan da sezine bastaǵanyn atap ótti.

«Qazirgi naqty jaǵdaıda ekologııa men klımattyń ózgerýimen kúres salasyndaǵy yntymaqtastyq erekshe ózekti. Bul saladaǵy jaǵdaı qatty alańdatady. Biz barsha memleketterge orasan zor zııan keltiretin ártúrli tabıǵı apattardyń aıtarlyqtaı óskenine kýá boldyq. Jýyqta Qazaqstan buryn-sońdy bolmaǵan sý tasqynynyń zardabyn bastan ótkerdi. Mamandardyń aıtýynsha, bul tabıǵı apattyń aýqymy jahandyq jylyný úderisimen tikeleı baılanysty», - dedi Qasym-Jomart Toqaev.

Prezıdent klımat problemalaryn jalǵyz sheshý múmkin emes ekenin atap ótti.

«Dúnıejúzilik qoǵamdastyq barsha memleketti damytý men jańǵyrtýdyń ózekti mindetterine nuqsan keltirmesten ekonomıkany kómirteksizdendirý jolyndaǵy sheshýshi baǵytty jalǵastyrýy kerek dep esepteımin», - dedi Memleket basshysy.

Aıta ketý kerek, kezdesýge ShYU-ǵa múshe 10 memlekettiń basshysymen qatar BUU Bas hatshysy Antonıý Gýterrısh, BAÁ Joǵary federaldyq keńesiniń múshesi, Ras-ál-Haıma ámiri Saýd ıbn Sakr ál-Kasımı, Túrikmenstan Halk Maslahatynyń tóraǵasy Gýrbangýly Berdimuhamedov, Mońǵolııa Prezıdenti Ýhnaagıına Hýrelsýha, Ázerbaıjan Prezıdenti Ilham Álıev, Túrkııa Prezıdenti Rejep Taııp Erdoǵan, Qatar Memleketiniń Ámiri sheıh Támım ben Hamad Ál Tánı qatysyp otyr.