Energetıka mınıstrligi tabıǵı gaz óndirisiniń tómendegeni týraly aqparatty joqqa shyǵardy

ASTANA. KAZINFORM - 2025 jyldyń qańtar–shilde aılary aralyǵynda Qazaqstanda 17,3 mlrd tekshe metr gaz óndirildi. Bul ótken jyldyń sáıkes kezeńimen salystyrǵanda 1,46 mlrd tekshe metrge nemese 9,2%-ǵa kóp, dep habarlaıdy QR Energetıka mınıstrliginiń baspasóz qyzmeti.

Osy rette aıta ketetin másele - buqaralyq aqparat quraldarynda taraǵan gaz óndirisiniń tómendegeni jónindegi aqparat resmı derekterge sáıkes kelmeıdi. Ulttyq statıstıka bıýrosynyń jedel derekteri oń dınamıkany rastaıdy. Oǵan sáıkes óndirý kólemi ótken jyldyń sáıkes kezeńimen salystyrǵanda 111,1%-dy qurady.

- Mınıstrlik jaǵdaıdy obektıvti túrde kórsetý úshin tek tekserilgen derekterdi paıdalanýǵa shaqyrady. Sonymen qatar, tutynýshylar úshin gaz baǵasynyń ósýi óndirý kólemimen baılanysty emes. Bul – baǵa belgileýdiń naryqtyq tetikterine kóshýge baǵyttalǵan reformanyń josparly ári baqylaýdaǵy kezeńi,- delingen habarlamada.

Atalǵan shara salanyń uzaq merzimdi turaqtylyǵyn qamtamasyz etý, jańa ken oryndaryn ıgerýge ınvestıtsııa tartý jáne bolashaqta tapshylyq táýekelderiniń aldyn alý úshin qajet.

Energetıka mınıstrligi tarıfterdiń ózgerýi – eldegi barlyq tutynýshylardy uzaq merzimdi perspektıvada úzdiksiz gazben qamtýdy qamtamasyz etetin baıypty sheshim ekenin atap ótti.

Osyǵan deıin Energetıka mınıstrligi elimizde 12,6 mıllıon adam tabıǵı gazben qamtylǵany týraly habarlaǵan edi.