Qazaqstandaǵy sýperkompıýterge qosymsha qýatty chıpter jetkiziledi

ASTANA. KAZINFORM – Aldaǵy 4 aıda elimizge sýperkompıýterdi qurýǵa qajet Nvidia-nyń H200 chıpteri jetkizilýi múmkin. Bul týraly Tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Qanysh Tóleýshın málim etti.

- Buǵan deıin elimizge Nvidia-nyń alǵashqy chıpteri jetkizilgenin aıtqan edik. Bul chıpter sonshalyqty qýatty emes. Endi taıaýda H200 qurylǵylaryn, ıaǵnı sońǵy býyndy chıpterdi alyp kelýdi josparlap otyrmyz. Atap aıtqanda, aldaǵy 3-4 aıda Qazaqstan aýmaǵyna jetkizip, ornatylady. Jalpy, 64 klaster qamtylatynyn eskersek, aıtarlyqtaı kóp chıp derekterdi óńdeý ortylyǵymyzdyń bazasynda ornatylady. Bul rette, qaýipsizdiktiń barlyq talaby eskeriledi, - dedi Q.Tóleýshın elordada Parlament Májilisi janyndaǵy Qoǵamdyq palatanyń kóshpeli otyrysynda tilshiler suraǵyna jaýap bere otyryp.

Osy oraıda AQSh-taǵy jaýapty organdar elden osy chıpterdi Qazaqstanǵa eksporttaýǵa ruqsatyn bergen.

Onyń sózine qaraǵanda, atalǵan chıpterge jumsalǵan qarajat tez arada ózin aqtaıdy. Sebebi, qazirdiń ózinde sýperkompıýterdiń qýatyn jalǵa alýǵa tıisti uıymdar tapsyrys berip jatyr.

Eske salsaq, atalǵan zań jobasy bıyl naýryz aıynda Májiliste tanystyrylǵan edi.

Zań jobasy jasandy ıntellekt tehnologııalaryn (júıelerin) paıdalanýdyń biryńǵaı quqyqtyq bazasyn belgileýge baǵyttalǵan.

Buǵan deıin Qazaqstan qýaty kúshti sýperkompıýter qurýǵa kiriskenin jazǵan edik.

Byltyr kúzde mınıstrlik sýperkompıýter úshin jabdyqqa Amerıka Qurama Shtattaryna aldyn ala tapsyrys bergenin málimdedi. 

Degenmen, Qazaqstanǵa jabdyqty jetkizý merzimi AQSh úkimetiniń Qazaqstan Respýblıkasyna chıpterdi eksporttaý týraly qorytyndysyn shyǵarýyna baılanysty. Amerıkalyq tarap eksport lıtsenzııasyn alý protsesi uzaqqa sozylatynyn habarlady.

Bıyl sáýir aıynyń basynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstanǵa qýaty kúshti sýperkompıýter qurýǵa qajet jabdyqtar taıaý arada jetkiziletinin aıtty. 

Sýperkompıýterge qajet Nvidia-nyń alǵashqy chıpteri Qazaqstanǵa jetkizildi.