Qazaqstandaǵy sýarmaly jerdiń 44%-ynda sý únemdeý tehnologııalary qoldanylady
ASTANA. KAZINFORM - QR Aýyl sharýashylyǵy vıtse-mınıstri Nazgúl Hatepova bastaǵan delegatsııa Qytaıdyń Shensı provıntsııasynda ótken 33-shi ıAnlın aýyl sharýashylyǵy kórmesine qatysty, dep habarlaıdy QR Aýyl sharýashylyǵy mınıstriginiń baspasóz qyzmeti.
Shanhaı yntymaqtastyq uıymynyń (ShYU) zamanaýı aýyl sharýashylyǵyn damytý jónindegi 2026 jylǵy dóńgelek ústelinde Nazgúl Hatepova klımattyń ózgerýi men sý tapshylyǵynyń kúsheıýine baılanysty sý resýrstaryn utymdy paıdalaný, zamanaýı sýarý tehnologııalaryn engizý jáne halyqaralyq tehnologııalyq yntymaqtastyqty damytý máseleleriniń mańyzy artyp kele jatqanyn atap ótti.
Onyń aıtýynsha, bul baǵyttar Qazaqstan úshin strategııalyq mańyzǵa ıe. Óıtkeni olar azyq-túlik qaýipsizdigin qamtamasyz etýge, agroónerkásiptik keshenniń turaqtylyǵyn arttyrýǵa jáne aýyldyq aýmaqtardy damytýǵa tikeleı áser etedi.
-ShYU-ǵa múshe memleketterdiń ǵylymı, tehnologııalyq jáne óndiristik áleýetin biriktirý tıimdi sheshimderdi jedel engizýge, aýyl sharýashylyǵynyń ónimdiligin arttyrýǵa jáne sý resýrstaryn utymdy paıdalanýǵa múmkindik beredi dep senemiz. Yntymaqtastyq naqty nátıjelerge baǵyttalyp, aýyl sharýashylyǵy taýaryn óndirýshilerdiń suranysyna jaýap berýi qajet, — dedi Nazgúl Hatepova.
Sondaı-aq vıtse-mınıstr Qazaqstanda sýarmaly sýdy tıimdi paıdalaný, ırrıgatsııalyq ınfraqurylymdy jańǵyrtý jáne sýdy únemdeý tehnologııalaryn engizýdi yntalandyrý baǵytynda atqarylyp jatqan jumystarǵa toqtaldy.
Qazirgi ýaqytta Qazaqstanda 1,6 mln gektar sýarmaly jer bar. Onyń 702,3 myń gektarynda sýdy únemdeý tehnologııalary qoldanylady. Bul sýarmaly alqaptardyń jalpy kóleminiń shamamen 44%-yn quraıdy. 2025 jyldyń qorytyndysy boıynsha zamanaýı sýarý júıelerin qoldaný nátıjesinde shamamen 874 mln tekshe metr sý únemdelgen.
Aýyl sharýashylyǵy óndirýshileriniń zamanaýı sýarý tehnologııalaryna kóshýin jedeldetý maqsatynda memleket qarjylaı qoldaý sharalaryn keńeıtip keledi. Atap aıtqanda, sýdy únemdeý júıelerin satyp alý jáne ornatý shyǵyndarynyń ótemaqysy 60%-dan 80%-ǵa deıin ulǵaıtyldy. Al mundaı júıelerdi paıdalanatyn sharýashylyqtar úshin sýarý sýynyń qunyn sýbsıdııalaý úlesi 50%-dan 85%-ǵa deıin arttyryldy. Budan bólek, 2026–2028 jyldary sýdy únemdeý tehnologııalaryna ınvestıtsııalyq sýbsıdııa berýge 214,6 mlrd teńge bólý josparlanǵan.
Elimizde ırrıgatsııalyq jabdyqtardyń otandyq óndirisi de damyp keledi. Sonymen qatar agrarlyq sektordy qajetti tehnıkamen qamtamasyz etý múmkindikteri keńeıtilip, sý resýrstaryn basqarý tásilderi jetildirilýde.
Osyǵan deıin qazaqstandyq mamandardyń Qytaıdyń sý únemdeý tehnologııalaryn zerdelep jatqany týraly jazdyq.
