Qazaqstandaǵy sporttyń jańa dáýiri: «Bolashaq oıyndary – 2026» halyqaralyq týrnıri aıaqtaldy
ASTANA. KAZINFORM – Astanada halyqaralyq «Bolashaq oıyndary – 2026» týrnıri aıaqtaldy. On kún boıy elorda fıdjıtal sporttyń álemdik ortalyǵyna aınalyp, tsıfrlyq tehnologııalar men dástúrli sportty biriktirgen jarystarǵa myńdaǵan jankúıer kýá boldy. Jalpy júlde qory 4,65 mln dollar bolǵan týrnır Qazaqstan úshin jańa sporttyq baǵyttardy damytý men halyqaralyq tájirıbe jınaqtaýdyń mańyzdy alańyna aınaldy.
Sandarmen aıtar bolsaq, jobany uıymdastyrýǵa 4 nysan, 528 oıyn tehnıkasy men 500-den astam oıyn orny jumyldyryldy. Segiz fıdjıtal-dıstsıplına tsıfrlyq jarystardy shynaıy sportpen biriktirdi. Al 800 volonter jobanyń mańyzdy bóligine aınaldy.
«Bolashaq oıyndary 2026» klassıkalyq jarystar aıasynan shyqty. Qazaqstan dástúrli sport, kıbersport jáne zamanaýı tehnologııalardyń toǵysynda qurylǵan jańa formattaǵy halyqaralyq jobany qabyldady. Elimiz kıbersport, aqparattyq tehnologııalar, teletranslıatsııa, ınjenerııa, logıstıka, qaýipsizdik jáne iri sporttyq jarystardy ótkizý salalarynda jańa kásibı daǵdylar men tájirıbe aldy.
Sonymen qatar bul Astananyń damýyna jáne Qazaqstannyń týrıstik tartymdylyǵyna orasan zor úles qosty. Túrli elderden kelgen sportshylar, komandalar, jankúıerler men mamandar Qazaqstandy baı tarıhy men mádenıeti bar el retinde ǵana emes, eń kúrdeli halyqaralyq tehnologııalyq jobalardy júzege asyrýǵa qabiletti zamanaýı memleket retinde kórdi.
– Eń bastysy, bul tájirıbe Qazaqstanda qalady. Mamandar, qurylǵan komandalar, tehnıkalyq sheshimder jáne osyndaı aýqymdaǵy is-sharalardy qalaı ótkizý kerektigi týraly túsinik qalady. «Bolashaq oıyndary 2026» týrnıriniń basty qorytyndysy – sátti ótken jarystar ǵana emes, el ishinde qurylǵan adamı, tehnologııalyq jáne uıymdastyrýshylyq kapıtal. Qazaqstannyń álemdik deńgeıdegi jobalardy qabyldaı alatyny jáne olardy ótkizý alańy ǵana emes, bolashaqtyń sporttyq is-sharalaryn qurýda tolyqqandy uıymdastyrýshy jáne seriktes bola alatyny dáleldendi, – dep málimdedi uıymdastyrýshylar.
«Bolashaq oıyndary 2026» chempıondary:
1. Phygital Basketball presented by Halyk Fund
• 1 oryn - Wilders ($100 000)
• 2 oryn - LIGA PRO TEAM ($60 000)
• 3 oryn - Dangerous ($35 000)
2. MOBA PC Dota 2 presented by Centercredit
• 1 oryn - PlayTime ($350 000)
• 2 oryn - Yakult Brothers ($160 000)
• 3 oryn - Team Resilience ($120 000)
3. Phygital Dancing presented by Solidcore Resources
• 1 oryn - Franco Vitali ($20 000)
• 2 oryn - Lina ($15 000)
• 3 oryn - Sergio Mayta ($10 000)
4. Phygital Shooter CS 2 presented by Yandex GO
• 1 oryn - Team KZ ($50 000)
• 2 oryn - Liga Pro Team ($35 000)
• 3 oryn - Minsk House ($20 000)
5. Phygital Fighting presented by Kazzinc
• 1 oryn - Archangel Michael ($100 000)
• 2 oryn - NEFOR TEAM ($80 000)
• 3 oryn - RCC ($70 000)
6. Phygital Football presented by Samruk-Kazyna
• 1 oryn - NS Team ($150 000)
• 2 oryn - Quetzales-Armadillos ($85 000)
• 3 oryn - FC Olympic Phygital ($50 000)
7. MOBA Mobile MLBB presented by Freedom
• 1 oryn - Bigetron by Vitality ($315 000)
• 2 oryn - ONIC ($144 000)
• 3 oryn - Aurora Gaming ($108 000)
8. Battle Royale - PUBG: BATTLEGROUNDS Presented by Alatau City Bank
• 1 oryn: 17 Gaming ($300 000)
• 2 oryn: GAM The Expendables ($120 000)
• 3 oryn: Team Vitality ($100 000)
Aıta keteıik, 29 shildede Astanada «Bolashaq oıyndary – 2026» týrnıriniń ashylý rásimi ótti.
Saıysta 34 eldiń 800-den astam ókili baq synady. Týrnırde sportshylar fıdjıtal-fýtbol, fıdjıtal-basketbol, fıdjıtal-jekpe-jek, fıdjıtal-shýter, fıdjıtal-bı, Dota 2, Mobile Legends: Bang Bang jáne PUBG: Battlegrounds sekildi 8 baǵyt boıynsha kúsh synasty.
Keshe qazaqstandyq Team KZ Phygital Shooter CS 2 dıstsıplınasy boıynsha chempıon atandy.
