Qazaqstandaǵy sheteldik JOO fılıaldaryna qalaı túsýge bolady
ASTANA. KAZINFORM – QR Ǵylym jáne joǵary bilim mınıstri Saıasat Nurbek Qazaqstanda sheteldik JOO fılıaldaryna túsý talaptary týraly aıtyp berdi.
«Mundaǵy mańyzdy nárse — talapkerlerdi irikteýdi sheteldik fılıaldardyń ózi júrgizedi, biz oǵan ruqsatymyzdy berdik. Óıtkeni ár ýnıversıtettiń stýdent qabyldaýdaǵy óz talaptary bolady, til bilimin dáleldeıtin IELTS sertıfıkaty suralady, biz oǵan aralasa almaımyz. Bir ǵana jeńildik: alǵashqy jyly tilge qoıylatyn talaptardy tómendettik, óıtkeni oqýǵa túskenderdiń barlyǵy aldymen foundation — daıyndyq kýrsynan ótedi. Olar jyl boıy til, akademııalyq jazý, zertteý ádisterin qarqyndy úırenedi. Bakalavrıattyń birinshi jylyn bastaý úshin til deńgeıin qajetti deńgeıge kóteretin ýaqyt bar», — dep túsindirdi S. Nurbek Ortalyq kommýnıkatsııalar qyzmetinde.
Onyń aıtýynsha, sheteldik JOO fılıaldarynyń oqýǵa qabyldaý merzimderi de basqasha, shaqyrý naýqany aqpan aıynan beri júrgizilip keledi. Sonymen qatar, memlekettik granttar da bólinedi.
«Osy fılıaldarǵa túsetin barlyq stýdentterge ázirshe granttar beriledi. Bul fılıaldy qoldaý úshin qajet», — dedi mınıstr.
Oqytýshylar arasynda mindetti túrde halyqaralyq mamandar bolady.
Budan basqa, «Bolashaq» baǵdarlamasynyń túlekteri, shetelde bilim alǵan qazaqstandyqtar belsendi túrde tartylady. Bul rette jergilikti seriktes JOO óz oqytýshylaryn sheteldik keńsege oqýǵa jiberedi.
Mysaly, qazir Edınbýrgte 16 qazaqstandyq oqytýshy bilim alýda. Bul qosymsha pánderdi jergilikti resýrstar esebinen oqytý úshin jasalyp otyr.
«Sheteldik seriktes sapa standartyna kepildik beredi jáne barlyq negizgi pánderdi olardyń úzdik oqytýshy-professorlary oqytady», — dep atap ótti Saıasat Nurbek.
