Qazaqstandaǵy shaǵyn jáne orta bıznes sany 2,1 mln-nan asty
ASTANA. KAZINFORM — 2021 jyldan bastap Qazaqstanda kásipkerlik qyzmet salasynda jańa retteýshilik saıasatty kezeń-kezeńimen engizý boıynsha jumys júrgizilýde. 2024 jylǵy 6 sáýirde memlekettik qadaǵalaýdy jetildirgen jáne 10 myńnan astam artyq talaptardyń kúshin joıǵan bıznesti júrgizý týraly zań qabyldandy. Bul týraly Úkimet málim etti.
Bas prokýratýranyń málimetinshe, 2024 jyly bızneske qadaǵalaý júktemesi 2019 jylmen salystyrǵanda 58%-ǵa tómendegen. Oǵan qosymsha 2024 jylǵy 30 jeltoqsanda Bırjalyq saýda jáne kásipkerlik máseleleri jónindegi zańmen ınvestorlarǵa qadaǵalaý júktemesin azaıtý maqsatynda kez kelgen shekteý jáne tyıym salý sharalaryn prokýrorlardyń maquldaýyn talap etetin «prokýrorlyq súzgi» tetigi engizildi.
Sonymen qatar, lıtsenzııalaýdyń qoljetimdiligi men boljamdylyǵy artady: 2025 jyldyń sońyna deıin bıznestiń ártúrli lıtsenzııalar men ruqsattardy alýy úshin biliktilik talaptary qaıta qaralady, sondaı-aq olardy alý rásimderi men merzimderi ońtaılandyrylady.
— Bıznes birqatar esepterdi tapsyrýdan bosatyldy. Kásipkerlik qyzmettiń 58 salasynda bar 381 aqparattyq qural 49%-ǵa ońtaılandyryldy jáne 37%-ǵa avtomattandyryldy. Qabyldanǵan sharalar nátıjesinde shaǵyn jáne orta bıznes sany 2024 jylmen salystyrǵanda 4,7%-ǵa nemese 96 209 kásiporynǵa ósip, 2 125 003 kásiporyndy qurady. Ekonomıkadaǵy ShOB úlesi de 0,9 paıyzdyq tarmaqshaǵa ósip, 38,6%-ǵa jetti, — delingen habarlamada.
Shaǵyn jáne orta bıznes sýbektileriniń ónim shyǵarý kólemi 18,7 trln teńgeni qurap, 11,4%-ǵa ulǵaıdy. Prezıdenttiń tapsyrmasyna sáıkes, memlekettiń bıznespen ózara is-qımyl jasaý tásilderi qadaǵalaýdan seriktestikke qaraı ózgerýde. 2025 jyldyń 1 sáýirinde kásipkerlerdi qoldaý úshin arnaıy jasalǵan zamanaýı tsıfrlyq kómekshi — eGov Business mobıldi qosymshasy jańartyldy.
Bul qosymsha mobıldik baılanys qurylǵylaryn paıdalana otyryp ShOB-qa arnalǵan memlekettik qyzmetterdi kórsetý protsesterin, memlekettik qoldaý sharalary men «Elektrondyq úkimet» servısterin avtomattandyrýǵa arnalǵan. Jańa qyzmetter arasynda kásiporyndy tirkeý, salyq kúntizbesi, elektrondy sertıfıkattar alý jáne qujattarǵa tsıfrlyq qol qoıý sııaqty servıster qoljetimdi.