Qazaqstandaǵy saılaý ýchaskelerinde azamattarǵa daýys berýge qolaıly jaǵdaı jasalǵan – Belarýs ókili
ASTANA. KAZINFORM – Belarýs Respýblıkasy Ulttyq jınalysy Respýblıka Keńesiniń bilim, ǵylym, mádenıet jáne áleýmettik damý jónindegi turaqty komıssııasynyń tóraǵasy Natalııa Pavlıýchenko Quryltaı saılaýyn uıymdastyrý barysynda Ortalyq saılaý komıssııasy atqarǵan jumysty joǵary baǵalady.
– Ortalyq saılaý komıssııasy saılaý komıssııalarymen de, baıqaýshylarmen de aýqymdy jumys júrgizgenin erekshe atap ótkim keledi. Oqytý jumystarynyń biryńǵaı standarttary qalyptastyrylǵan, kásibı komanda jumys istedi. Bul jerde barlyq saılaý ýchaskeleriniń el boıynsha biryńǵaı stılde bezendirilgeni óte mańyzdy. Barlyǵy qoljetimdi ári kórneki túrde uıymdastyrylǵan. Bul saılaýshylar úshin, olardyń óz erkin bildirýi úshin jaqsy jaǵdaı jasaıdy, – dedi Natalııa Pavlıýchenko.
Onyń aıtýynsha, saılaý kúni aýa raıy qubylmaly bolǵanyna qaramastan, qazaqstandyqtar daýys berý úshin saılaý ýchaskelerine belsendi túrde barǵan.
– Aýa raıynyń qubylmaly bolǵanyna qaramastan, saılaý kúni qazaqstandyqtar ýchaskelerge barýyn jalǵastyrdy. Adamdardyń otbasylarymen birge kelgenin, jas býynnyń da belsendi qatysqanyn kórdik. Bul óte mańyzdy. Aqparattyq jumys ta naqty ári maqsatty túrde júrgizilgen, – dep túıindedi ol.
Aıta ketkeıik, ShYU baıqaýshylar mıssııasy Quryltaı saılaýyn demokratııalyq ári ashyq ótti dep baǵalady.
