Qazaqstandaǵy saıası reformalar ýaqyt talabyna saı – Qyrǵyz sarapshysy

ASTANA. KAZINFORM – Qyrǵyzstan sarapshysy Qyzylordada ótken V Ulttyq quryltaı Qazaqstandaǵy saıası ózgeristerdiń jańa belesine jol ashqanyn aıtady.

«Oı Ordo» saraptamalyq bastamalar ortalyǵynyń dırektory Igor Shestakov Qazaqstanda júrgizilip jatqan reformalar ýaqyt talabyna saı ekenin, Ortalyq Azııa men postkeńestik elderge mańyzdy bolatyn jańa saıası modelderdi qalyptastyrýǵa jol ashatynyn aıtady.

- Vıtse-prezıdent laýazymyn qaıtarý Qazaqstandaǵy ýaqtyly qadam bolyp otyr. Óıtkeni bılik ókilettikterin qaıta bólý arqyly parlamenttik-prezıdenttik memlekettiń negizi qalanyp jatyr. Protsess eń aldymen qoǵamdyq-saıası jáne áleýmettik turaqtylyqqa baǵyttalǵan, - dep atap ótti saıasattanýshy.

Sarapshy Qazaqstan halqy Assambleıasynyń tájirıbesin Halyq keńesiniń alańyna berý de zańdylyq ekenin aıtady.

- Qazir ýaqyt naqty uıymdardy talap etedi, olar búginniń shyndyǵyna negizdelip, memlekettik basqarý júıesinde halyq ókilderiniń bolýyn qamtamasyz etedi, - deıdi ol.

Igor Shestakovtyń aıtýynsha, Qazaqstandaǵy Parlament reformasy kútilgen oqıǵa edi.

- Qyrǵyzstan jyldar boıy bir palataly parlament júıesimen júrdi. Bul júıe depýtattardy saılaýshylarǵa jaqyndata túsedi. Qazaqstan júzege asyryp jatqan reformalar bolashaqta Ortalyq Azııanyń basqa elderi úshin úlgi bola alady, - deıdi saıasattanýshy.

Sarapshy Ortalyq Azııa álemde bolyp jatqan geosaıası turaqsyzdyq aıasynda turaqtylyq kórsetip otyrǵanyn erekshe atady.

- Árıne, Prezıdent Qasym-Jomart Toqaevtyń qabyldaǵan qadamdary Qazaqstandaǵy qoǵamdyq-saıası turaqtylyqty nyǵaıtady jáne jalpy óńirdegi protsesterge oń áser etedi, - dep túıindedi ol.

Buǵan deıin Parlamenttegi partııalar bir palataly júıege kóshý máselesin qoldaý bildirgenin jazǵan edik.