Qazaqstandaǵy saıası reformalar Eýropa tarapynan moıyndaldy

ASTANA. KAZINFORM — Eýropalyq keńestiń Parlamenttik Assambleıasy (EKPA) «Qazaqstannyń demokratııalyq reformalaryn jáne óńirlik kóshbasshylyǵyn qoldaý» (Support for Kazakhstan’s Democratic Reforms and Regional Leadership) atty jazbasha deklaratsııany qabyldady, dep habarlaıdy SІM baspasóz qyzmeti.

— Qujattyń avtory — bedeldi brıtandyq depýtat Maıkl German («Eýropa úshin lıberaldar men demokrattar alıansy» partııasynyń múshesi). Deklaratsııaǵa EKPA-nyń ártúrli saıası fraktsııalarynyń 21 múshesi qol qoıdy. Málimdemede Qazaqstannyń aýqymdy demokratııalyq reformalardy iske asyrýǵa degen ózgermes ustanymy joǵary baǵalanyp, elimizdiń demokratııalyq basqarýdy damytý, adam quqyqtaryn qorǵaý jáne zań ústemdigin nyǵaıtý salalarynda óńirlik kóshbasshy mártebesin bekite túsetini atalyp ótti, — delingen habarlamada.

Qazaqstannyń saıası basshylyǵynyń demokratııalyq transformatsııany ilgeriletý maqsatynda qabyldaǵan mańyzdy qadamdaryn, sonyń ishinde konstıtýtsııalyq jáne zańnamalyq reformalardy, sondaı-aq ólim jazasyn joıýyn qoldady.

Sondaı-aq Qazaqstan men Eýropalyq keńes arasyndaǵy sot júıesin reformalaý, sybaılas jemqorlyqqa qarsy is-qımyl, adam quqyqtaryn ilgeriletý jáne demokratııalyq ınstıtýttardy nyǵaıtý sııaqty negizgi baǵyttar boıynsha yntymaqtastyq erekshe nazarǵa alyndy. Bul óz kezeginde, naqty nátıjelerge qol jetkizýge jáne Qazaqstannyń óńirdegi demokratııalyq damýdyń úlgisi retindegi rólin kúsheıtýge yqpal etti.

Qujat Qazaqstanda júzege asyrylyp jatqan demokratııalyq transformatsııany qoldaýǵa, sondaı-aq demokratııa, adam quqyqtary jáne zań ústemdigi sııaqty ortaq qundylyqtardy ilgeriletý maqsatynda yntymaqtastyqty odan ári damytýǵa járdemdesýge shaqyrady.

Budan buryn Eýropalyq keńestiń Parlamenttik Assambleıasy Qazaqstan reformalaryn joǵary baǵalaǵanyn jazǵanbyz.