Qazaqstandaǵy referendým: Sadyr Japarov Qasym-Jomart Toqaevty quttyqtady

ASTANA. KAZINFORM — Memleket basshysy Qyrǵyz Respýblıkasynyń Prezıdenti Sadyr Japarovpen telefon arqyly sóılesti, dep habarlaıdy Aqordanyń baspasóz qyzmeti.

Sadyr Japarov Qasym-Jomart Toqaevty Qazaqstandaǵy jalpyhalyqtyq referendýmnyń tabysty ótýimen quttyqtady.

Qyrǵyzstan Prezıdentiniń pikirinshe, jańa Konstıtýtsııa boıynsha daýys berý qorytyndysy qazaqstandyqtardyń Qasym-Jomart Toqaev qolǵa alǵan saıası jáne áleýmettik-ekonomıkalyq jańǵyrý jolyn tolyq qoldaıtynyn kórsetedi.

— Memleket basshysy jyly lebizi jáne Qyrǵyzstannan baıqaýshylar jibergeni úshin Sadyr Japarovqa rızashylyǵyn bildirdi. Sondaı-aq konstıtýtsııalyq reforma memlekettik basqarýdyń tıimdiligi men halyqtyń ál-aýqatyn arttyrýǵa baǵyttalǵanyn aıtty. Taraptar qazaq-qyrǵyz san qyrly qarym-qatynasyn odan ári nyǵaıtý perspektıvasyn talqylady. Eki el arasyndaǵy strategııalyq seriktestik pen odaqtastyqty jan-jaqty tereńdetýge nıetti ekenderin rastady, — delingen habarlamada.

Prezıdentter óńirlik jáne halyqaralyq kún tártibindegi ózekti máseleler jóninde pikir almasty. Sonymen qatar aldaǵy kezdesýlerdiń kestesin pysyqtady.

Osyǵan deıin Shavkat Mırzıeev qazaq elin jańa Konstıtýtsııa referendýmynyń tabysty ótýimen quttyqtaǵanyn jazǵanbyz.