Qazaqstandaǵy raqymshylyq: Pavlodarda 27 sottalýshy tolyq bosatylady
PAVLODAR. KAZINFORM - Oblys ortalyǵynda sot probatsııa qyzmetiniń kezekti usynymdary qaralyp, sottalǵan azamattardy jazanyń qalǵan bóligin óteýden bosatý týraly sheshim qabyldanyp jatyr. Pavlodar qalasynyń qylmystyq ister jónindegi aýdanaralyq sotyna 167 materıal joldanǵan.
Jańa Konstıtýtsııanyń qabyldanýyna baılanysty jarııalanǵan raqymshylyq týraly zań óńirlerde kezeń-kezeńimen júzege asyrylyp jatqany belgili. Bul bireýler úshin jaza merziminiń qysqarýy bolsa, endi bireýler úshin ómirdi jańadan bastaýǵa berilgen múmkindik.
- Búgingi kúnge deıin Pavlodar qalasynyń qylmystyq ister jónindegi aýdanaralyq sotyna 167 materıal joldandy. Onyń ishinde 27 sottalǵan azamat tolyq bosatylýǵa jatady. Qalǵandaryna jaza merzimin qysqartý qoldanylady. Búgin sondaı isterdiń biri qaralyp, sot sottalǵan azamatty bas bostandyǵyn shekteý jazasyn tolyq óteýden bosatý týraly sheshim qabyldady. Probatsııa qyzmeti zańnyń talaptaryn ýaqytyly oryndaý úshin barlyq qajetti sharalardy qabyldap jatyr, - deıdi Pavlodar qalasy probatsııa qyzmeti bastyǵynyń mindetin atqarýshy Almagúl Abdýlına.
Eske sala keteıik, Jetisý oblysynda 19 myńnan astam adam ákimshilik raqymshylyqqa ilikti.
