Qazaqstandaǵy iri saýda ortalyqtaryna metall detektorlaryn ornatý usynyldy
ASTANA. KAZINFORM – Saýda jáne ıntegratsııa mınıstrligi bólshek saýda nysandaryna qatysty terrorızmge qarsy sharalardy kúsheıtýge qatysty buıryq jobasyn qoǵamdyq talqylaýǵa usyndy.
Vedomstvo «Ashyq NQA» portalynda «Qazaqstan Respýblıkasy Saýda jáne ıntegratsııa mınıstrliginiń terrorıstik turǵydan osal obektilerin jáne terrorıstik turǵydan osal ishki saýda obektilerin terrorızmge qarsy qorǵaýdy uıymdastyrý jónindegi nusqaýlyqty bekitý týraly» Qazaqstan Respýblıkasy Saýda jáne ıntegratsııa mınıstriniń 2023 jylǵy 5 qazandaǵy № 366-NQ buıryǵyna ózgerister engizý týraly» Saýda jáne ıntegratsııa mınıstri buıryǵynyń jobasyn jarııalady.
Joba Qazaqstan Respýblıkasy Úkimetiniń 2021 jylǵy 6 mamyrdaǵy № 305 qaýlysymen bekitilgen terrorıstik turǵydan osal obektilerdi terrorızmge qarsy qorǵaýdy uıymdastyrýǵa qoıylatyn talaptarǵa sáıkes ázirlengen.
Joba halyq kóp jınalatyn iri saýda-oıyn-saýyq ortalyqtarynda terrorızmge qarsy qorǵaý sharalaryn kúsheıtýge baǵyttalǵan.
Jobaǵa sáıkes, aýdany 10 000 sharshy metrden asatyn iri saýda jáne oıyn-saýyq ortalyqtarynyń ıeleri men basqarýshylary terrorızmge osal nysandarda qaýipsizdik qyzmetterin kórsetýge lıtsenzııasy bar uıymdarmen qaýipsizdik qyzmeti týraly kelisimsharttar jasasýǵa mindetti.
Qujatta sondaı-aq ǵımarattardyń ınjenerlik jáne tehnıkalyq qaýipsizdigine, kirýdi baqylaý júıelerine jáne beınebaqylaýǵa qoıylatyn talaptar kórsetilgen. Aýdany 10 000 sharshy metrden asatyn saýda jáne oıyn-saýyq ortalyqtary kelýshilerdi tekserý qurylǵylarymen - portatıvti jáne statsıonarlyq metall detektorlarymen jabdyqtalýy tıis. Bul tehnıkalyq quraldar Qazaqstan Respýblıkasy Prezıdentiniń 2013 jylǵy 9 tamyzdaǵy №611 Jarlyǵyna sáıkes terrorıstik qaýip deńgeıin anyqtaý úshin paıdalanylatyn bolady.
Bul túzetýlerdiń qabyldanýy kún saıyn kóp adam keletin iri saýda jáne oıyn-saýyq ortalyqtarynyń qaýipsizdigin jaqsartady, yqtımal táýekelderdi azaıtady jáne ishki saýdadaǵy terrorızmge qarsy qaýipsizdik júıesin nyǵaıtady.