Qazaqstandaǵy partııalar áli de qalyptasý ústinde – Álıhan Báımenov

ASTANA. KAZINFORM – Qazaqstandaǵy partııalar áli de tolyq qalyptaspaǵan. Prezıdent Joldaýy aıasynda el damýynyń keleshektegi baǵdarlary talqylanǵan otyrysta Astana memlekettik qyzmet haby Basqarýshy komıtetiniń tóraǵasy Álıhan Báımenov elimizdegi partııalardyń jumysyna kóńili tolmaıtynyn jetkizdi.

– Bizdiń saıası júıe tek Konstıtýtsııadaǵy bılik tarmaqtarynyń turaqtylyǵymen ǵana emes, sol bılik pen halyqtyń arasynda dáneker bolatyn partııalardyń da myqtylyǵymen anyqtalady. Shyndyǵyn aıtý kerek, bizdegi partııalar áli de qalyptasý ústinde. Bul – bıliktegi de, oppozıtsııalyq partııalarǵa da qatysty. Olar áli tolyqqandy ózderiniń qundylyqtary men baǵdarlamasyna negizdelgen uıymǵa aınala qoıǵan joq. Úkimetke aıtatyn keıbir syn-eskertpelerin qarap otyrsań, «óz baǵdarlamasyn oqymaǵan ba, óz qundylyqtaryn túsinbegen be?» degen oı týady. Sol sebepti, osy partııalardyń damýy – bizdiń bolashaq damýymyz úshin mańyzdy, – deıdi spıker.

Astana memlekettik qyzmet haby Basqarýshy komıtetiniń tóraǵasy endi memleket jańa júıede jumys isteýge daıyn bolý kerektigin aıtty.

– Túbegeıli aıtqanda, bul Joldaý bárimizge úmit syılady. Bul úmittiń aqtalýy úshin barlyq deńgeıdegi jaýapty adamdar jańasha jumys isteýge daıyn bolýy kerek. Saılaý ádil ótpese, eshqandaı saıası reformanyń maǵynasy bolmaıdy. Sondyqtan kelesi Parlamenttegi saılaý ádil ótse, Qazaqstan óziniń ókiletti organyna súıene otyryp, turaqty damýǵa shyǵady, – dedi ol.

Eske sala keteıik, Májilis depýtaty Baqytjan Bazarbek Memleket basshysynyń bir palataly Parlament qurý úshin 2027 jyly jalpyulttyq referendým ótkizý jónindegi usynysyna pikir aıtty.