Qazaqstandaǵy otandyq dári-dármek óndirisi 39,8%-ǵa jetti
ASTANA. KAZINFORM — Memlekettiń júıeli qoldaýy men Densaýlyq saqtaý mınıstrligi júzege asyryp jatqan sharalardyń nátıjesinde Qazaqstandaǵy otandyq dári-dármek óndirýshileriniń úlesi zattaı kórsetkish boıynsha 39,8%-ǵa jetti. Bul týraly DSM málim etti.
Bul derekter dárilik zattardy tańbalaý jáne qadaǵalaý júıesi arqyly rastaldy, bul júıe naryqtyń naqty qurylymyn kórýge múmkindik berip, dárilik preparattar aınalymynyń ashyqtyǵyn qamtamasyz etedi. Bul týraly vıtse-mınıstr Tımýr Muratov Qazaqstan Respýblıkasynyń Parlamenti Májilisiniń Áleýmettik-mádenı damý komıtetiniń «Farmatsevtıka ındýstrııasyn damytý perspektıvalary» taqyrybyndaǵy kóshpeli otyrysynda aıtty.
Búginde Qazaqstannyń kórsetkishteri Germanııa, Frantsııa jáne AQSh sekildi birqatar damyǵan elderdiń deńgeıimen salystyrýǵa keledi. Bul — otandyq óndiristi damytý, lokalızatsııany qoldaý, uzaqmerzimdi kelisimsharttar jasaý, retteý tetikterin jetildirý jáne salaǵa ınvestıtsııa tartý baǵytyndaǵy júıeli jumystyń nátıjesi.
— 2025 jyldyń sońynan beri Qazaqstanda farmatsevtıka salasynda jalpy somasy shamamen 360 mlrd teńgeni quraıtyn 7 iri ınvestıtsııalyq kelisim jasaldy. Jańa jobalardyń sheńberinde dárilik zattar men medıtsınalyq ónimderdiń 500-ge jýyq jańa túrin óndirýdi iske qosý, sondaı-aq myńnan astam jańa jumys ornyn ashý josparlanyp otyr, — delingen vedomstvonyń habarlamasynda.
Mınıstrlik ózimizdiń farmatsevtıkalyq óndiristi damytý — bul tek ekonomıka men ınvestıtsııa máselesi ǵana emes ekenin habarlaǵan.
— Bul — eldiń dárilik qaýipsizdigi, densaýlyq saqtaý júıesiniń turaqtylyǵy jáne azamattardy sapaly preparattarmen qamtamasyz etý máselesi, — deıdi DSM baspasóz qyzmeti.
Aıta keteıik, elde allergııaǵa qarsy ınnovatsııalyq dári synaqtan ótip jatyr.
