Qazaqstandaǵy MRT men KT: óńirlerde qyzmet quny qansha
MRT (magnıtti-rezonansty tomografııa) jáne KT (kompıýterli tomografııa) qyzmetiniń baǵasynda úlken aıyrmashylyq bar. Al qyzmettiń bul túri memlekettik aýrýhanalarmen qatar jeke emhanalarda da kórsetiledi, dep habarlaıdy Kazinform agenttiginiń tilshisi.
Kompıýterli topografııa — adam aǵzasyndaǵy belgili bir dene múshesin tekserýge múmkindik beretin zamanaýı zertteý ádistemesi. KT-ǵa túsirgende kóbine ishki aǵzany, tamyr men tindi, sonymen birge súıek, tynys alý múshesi men keýde qýysyn zertteıdi. Rentgen túsirilimine qaraǵanda KT-nyń aýqymy keń.
Magnıtti-rezonansty tomografııa kezinde magnıttik órister men radıotolqyndy paıdalaný arqyly túsirilim jasalady. Tekserý kezinde jumsaq tinderdiń ózgerisin egjeı-tegjeı kórýge bolady.
Dárigerler KT men MRT-ny kóbine naqty bir aǵzany, dene múshesin zertteýge qoldanady. KT kezinde ókpe, tamyr, qursaq qýymy, omartqa men mıdy zertteıdi. Al MRT-ǵa mı, omyrtqa, túrli qan tamyry men qursaq qýysyn túsiredi.
KT qyzmetiniń baǵasy
KT qyzmetiniń keń taraǵan túri – keýde qýysy, ıaǵnı ókpeni zertteý. Reıtıng jasaý kezinde tekserýdiń osy túri negizge alyndy. Onyń kontrastty jáne kontrastty emes túri bar. Ekinshisi arzanyraq. Kontrastty KT ekinshisine qaraǵanda neǵurlym dál kórsetedi. Biz arzan zertteý ádisin, ıaǵnı kotrastty emes nusqasyn tańdadyq.
Eń arzan KT qyzmeti Qaraǵandyda kórsetiledi. Baǵasy 10 myń teńgeden bastalady. Ári qaraı Aqtaý, Taldyqorǵan, Petropavl, Oral, Semeı men Shymkent qalalary tur. Munda 12 myń teńgege KT-ǵa túsýge bolady. Sonymen birge elimizdiń astanasynda tekserýdiń bul túrine baǵa 12 400 teńgeden bastalady.
Al Taraz ben Túrkistan qalalarynda baǵa sál joǵary. Qyzmet quny 13 000 teńge jáne odan qymbat. Almaty qalasynda medıtsınalyq qyzmettiń bul túri keń taraǵan, usynys kóp. Munda eń arzany – 13 500 teńge. Pavlodardaǵy qyzmet quny - 13 800 teńge.
Atyraý qalasynda 3D túsirilimin jasaý qyzmetiniń baǵasy – 14 800 teńge. Eń arzany bul. Aqtóbe qalasynda 15 750 teńge bolyp tur. Kókshetaý qalasynda da baǵa osy shamalas. Dálirek aıtqanda 16 myń teńgeden bastalady.
Qostanaı men Óskemen qalalarynda KT-ǵa túsirý qyzmetiniń baǵasy 18 myń teńgeden bastalady. Qyzylordada ókpeti KT-ǵa túsirgen adamdar 20 myń teńge tólep júr. Elimiz boıynsha Jezqazǵan qalasynda qyzmettiń bul túri qymbat. KT tabý qıyn, bolǵan kúnniń ózinde baǵasy – 31 750 teńge.
MRT qyzmetiniń quny
MRT qyzmetiniń qunyn salystyrǵan kezde mıdy túsirýge qansha qarjy qajet ekenin bildik. Kontrastty MRT-ǵa túsirer aldynda boıaǵysh zat salady. Kontrastsyz túri ádette arzan keledi.
Mıdy MRT-ǵa túsirý Semeı qalasynda arzan. Munda adamdar 13 500 teńge tóleıdi. Sodan keıin Kókshetaý men Shymkent qalalary tur. Qyzmet quny 15 myń teńgeden bastalady.
Qyzylorda qalasynda tekserý quny – 16 myń teńge. Al Almatydaǵy joǵary básekelestik baǵaǵa óz áserin tıgizedi. MRT-ǵa túsý quny 16 900 teńgeden bastalady.
Elimizdiń ońtústik astanasyna qaraǵanda Taldyqorǵan qalasynda baǵa joǵary. Qyzmet aqysy 17 myń teńgeden bastalady. Al Pavlodarda – 17 500 teńge, Aqtóbede – 17 850 teńge.
Qyzmet aqysy 20 myń teńgege jýyqtaıtyn eki qala bar. Petropavlda 18 myń teńgeden, al Oralda 19 myń teńgeden bastalady. Qaraǵandy, Taraz, Atyraý men Astanada adamdar 20 myń teńge jáne odan joǵary tóleıdi.
Óskemen qalasynda MRT-ǵa túsý qyzmetiniń baǵasy 22 myń teńgeden bastalady. Qostanaı men Túrkistanda kem degende 24 myń teńge tóleıdi. Eń joǵary baǵa Aqtaý men Jezqazǵanda tirkeldi. Qyzmet quny 25 myń teńge jáne odan joǵary.
Aıta keteıik, buǵan deıin Qazaqstan qalalaryndaǵy pedıatr qabyldaýynyń quny, analız taldaýynyń baǵasy jazyldy.