Qazaqstandaǵy monetalarda ulttyq naqysh basym – kollektsıonerler
AQTÓBE. KAZINFORM – Tól teńgemizdi jınap, kollektsııa jınaıtyn aqtóbelikter sany 10-nan asady. Olar ulttyq naqyshy basym, dızaıny erekshe monetalar kollektsıonerler úshin taptyrmas olja dep sanaıdy ári ózge elge barǵanda moneta almastyryp, Qazaqstannyń tól teńgesin tanytyp júr.
6 jasymnan bastap moneta jınadym - Rınad Sharıpov
Qazaqstannyń ǵana emes, álem kýpıýrasy men monetasyn jınap, jyl saıyn kollektsııasynyń sanyn arttyryp otyrǵan Rınad Sharıpov óz «baılyǵy» týraly saǵattap aıtyp beredi. Bul hobbıi 60 jylǵa ýaqyttan beri ómiriniń bir bólshegine aınalǵan. Ózi sekildi adamdarmen aralasyp, tarıhy men onyń dızaıny, qundylyǵy týraly sóz qozǵaıdy. Ol kópshiliktiń qyzyǵýshylyǵyn arttyryp, ózi sekildi kollektsıonerlerdiń qataryn arttyrǵysy keledi.
- Kóshede kele jatqan kezde aıaǵyma dóńgelek bir zat ilikti. Moneta eken. Qyzyǵyp, saqtap júrdim. Keıin adamdar maǵan ózinde bar monetalardy berip, jınala bastady. 1978 jyly aqtóbelik nýmızmattardyń qataryna qosyldym. Al 1979 jyly ásker qataryna shaqyrylyp, soltústikke kettim. Ári qaraı jumys istep, 15 jyldan soń qaıta oraldym. Úsh jyl buryn nýmızmattar klýby bar ekenin bilip, qatarǵa qosyldym. Men aldymen reseılik, sheteldik monetalardy jınap júrdim. Qazaqstanǵa oralǵanda moneta túri kóp jáne ár alýan ekenin bilip, qyzyqtym. Klýb músheleri ózara satyp, satyp almaıdy. Tek bir-birine almastyrady. Bul óte qyzyq. Qazaqstanda moneta sany kóp, dızaıny da erekshe. Bizdiń eldegideı esh elde mundaı kóp kollektsııa joq sekildi. Fýtbol klýbtarynyń, qalalardyń, tarıhı tulǵalardyń da arnaıy monetalary bar. Flora men faýnanyń alýan úlgisin bir monetaǵa syıdyrdy. Bul keremet,- dedi kollektsıoner Rınad Sharıpov.
Aqtóbelik az danamen shyqqan monetalardy da satyp alǵan. Qazaqstannyń memlekettik nagradalarynyń monetasyn da Rınad Sharıpovtiń kollektsııasynan tabýǵa bolady. Batyrhan Shúkenovtiń qurmetine arnap shyǵarylǵan 5 myń danalyq monetanyń bir danasyn da alyp úlgergen.
- Qazaqstanda moneta kóp shyǵarylady ári ulttyq naqysh basym. Ózge elderdi qarap, kórip júrmin. Mundaı alýantúrlilik joq. Bul kollektsıonerler úshin taptyrmas olja,- dedi Rınad Sharıpov.
Kollektsııa jınaýdy pandemııa kezinde bastadym – Eldos Esirkepov
Aqtóbelik ınjener Eldos Esirkepovtiń kýpıýra men moneta jınap júrgenine 5 jyldan asty. 2020 jyldan bastap quny 10 mln teńgege jýyqtaıtyn dúnıeni óz kollektsııasyna engizdi. 200-den astam eldiń kýpıýrasy, 150-den astam eldiń monetasy saqtaýly.
- Alǵashynda jaı ǵana hobbı boldy. Keıin shyqqan jańa moneta men kýpıýrany Ulttyq bankten satyp ala bastadym. Bireý emes, birnesheýin alamyn. Sebebi biri ózińde qalady, ekinshisi almastyrǵan kezde óte qajet. Eger sırek kezdesetin aqsha men tıyn kezdesse satyp ta alamyz.
Negizi sý jańasynyń baǵasy joǵary. Eger bir sheti maıyssa, quny túse bastaıdy. Monetalarda da sondaı,- dedi kollektsıoner Eldos Esirkepov.
Ol ózge elge sapar shekken kezde de jınap, kóbeıtý úshin arnaıy satý oryndaryna barady. Kollektsııasyna qajetti qoraptardy da tapsyryspen alady.
- Búgin almasań, erteń qymbattaıdy. Qunyn joǵaltpaıdy, únemi kóterilip otyrady. Kollektsıonerlerde arnaıy baǵalaý kitapshasy bar. Soǵan súıenip, baǵasyn usynamyz. Adamdar qoldaǵy kýpıýra men moneta neǵurlym eski bolsa, baǵasy soǵurlym qymbat bolady dep oılaıdy. Negizi ol saqtalýyna baılanysty. Jańa kúıinde bolsa, búktelmese, syzat túspese qundy. Moneta da qaraıyp ketpese, baǵaly. Tól teńgemizdiń kýpıýra túriniń bárin taptym. Tek bireýi ǵana joq. Ol táýelsizdiktiń 10 jyldyǵyna arnalǵan 5 myń teńgelik aqsha. Aınalymda joq, tek adamdardyń qolynda bolýy múmkin. Sonymen birge men bir aqshanyń ár jyldary shyqqanyn da jınadym. Árqaısysynan aıyrmashylyq kórýge bolady. Tipti Ulttyq bank tóraǵalarynyń ózgergenin de aqsha arqyly kórýge bolady. Shetelde basylǵanyn da, elde shyǵarylǵanyn da ajyrata alamyn,- dedi ol.
Aıta keteıik, topaı asyq jınaǵan aqtóbelik kollektsıoner Gınness rekordtar kitabyna engisi keledi. Ol ázirge Qazaqstan rekordyn ornatty.