Qazaqstandaǵy medreseler jumysy qalaı retteledi

ASTANA. KAZINFORM – Qazaqstan musylmandary dinı basqarmasy janynda 9 medrese-kolledj jumys isteıdi. Bul týraly QR Mádenıet jáne aqparat mınıstrligi Din isteri komıteti Kazinform agenttiginiń resmı saýalyna bergen jaýabynda habarlady. 

Medrese – tehnıkalyq jáne kásiptik bilim berý uıymy bolyp sanalady, kolledj mártebesine ıe jáne óz qyzmetin tehnıkalyq jáne kásiptik bilim berýdiń memlekettik jalpyǵa mindetti standarttaryna sáıkes júrgizedi. 

Din isteri komıteti elimizde jumys isteıtin medrese-kolledjderdiń tizimin usyndy:

• Astana medrese-kolledji;

• «Ábý Hanıfa» medrese-kolledji (Almaty q.);

• Shymkent medrese-kolledji;

• Oral medrese-kolledji (Oral q.);

• Hıbatýlla Tarazı medrese-kolledji (Taraz q.);

• Ábý Bákir Sydyq medrese-kolledji (Pavlodar q.);

• Úshqońyr medrese-kolledji (Almaty oblysy, Jambyl aýdany, Qarǵaly aýyly);

• Saryaǵash medrese-kolledji (Túrkistan oblysy, Saryaǵash aýdany, Yntymaq aýyly);

• Aqtóbe medrese-kolledji (Aqtóbe oblysy, Alǵa aýdany, Bestamaq aýyly).

Atalǵan oqý oryndary «4S02210103 – Imam-hatıb», «4S02210104 – Ustaz» ıslamtaný baǵdarlamalary boıynsha dinı bilim berý salasyndaǵy mamandardy daıyndaıdy.

Komıtet málimetinshe, bul medrese-kolledjderde 2 921 stýdent bilim alýda, onyń ishinde 1 759 er bala, 1 162 qyz bala bar. Oqý aralas túrde, ıaǵnı uldar men qyzdar bir oqý ornynda qatar bilim alady.

− Medrese-kolledjderdiń bilim berý baǵdarlamalary jumys berýshilerdiń qatysýymen memlekettik jalpyǵa mindetti bilim berý standarty men kásibı standarttar talaptaryna negizdelip ázirlenedi. Sonymen birge medrese-kolledjderdegi mamandyqtar QR Bilim jáne ǵylym mınıstriniń 2018 jylǵy 27 qyrkúıektegi №500 buıryǵymen bekitilgen tehnıkalyq jáne kásiptik bilim berý mamandyqtary men biliktilikteri jikteýishine engizilgen. Atap aıtqanda, bul «Din jáne teologııa» bólimine (ıslamtaný, teologııa, hadıstaný) jatady. Bul medrese-kolledjderdiń oqytý baǵdarlamalarynyń zamanaýı standarttar men eńbek naryǵy talaptaryna saı bolýyn qamtamasyz etedi, - dep jazdy vedomstvo. 

Komıtettiń málimetinshe, medrese-kolledjderde qoldanylatyn dinı ádebıetter men oqý materıaldaryn QR Oqý-aǵartý mınıstrligine qarasty «Talap» KEAQ bekitedi jáne qadaǵalaıdy. Bul uıym tehnıkalyq jáne kásiptik bilim berý uıymdarynyń, sonyń ishinde medrese-kolledjderdegi dinı bilim berý mazmunynyń oqý baǵdarlamalary men oqýlyqtaryn saraptaý jáne bekitý jumystaryn júrgizetin negizgi organ sanalady.

Eske sala keteıik, buǵan deıin Saryaǵashtaǵy medrese-kolledjge memleket esebinen 1 mlrd 600 mln teńgeden astam qarjy bólingenin jazǵan edik.