Qazaqstandaǵy «Lýkoıl» aktıvteri: mınıstrlik AQSh-qa hat joldady
ASTANA. KAZINFORM – QR Energetıka mınıstrligi AQSh-tyń Qarjy mınıstrligi janyndaǵy Sheteldik aktıvterdi baqylaý jónindegi basqarmasyna (OFAC) «Lýkoıl» kompanııasynyń Qazaqstandaǵy jobalarynyń úlesin satyp alýǵa qatysty hat joldady.
Aıta ketý kerek, byltyr kúzde AQSh sanktsııasyna túsken «Lýkoıl» kompanııasy ózge elderdegi úlesin jappaı satatyny habarlandy.
Búgin Parlament Májilisindegi baspasóz máslıhatynda Energetıka mınıstri Erlan Aqkenjenov Úkimet aktıvterdi satyp alý boıynsha «Lýkoıl» kompanııasyna usynys jasamaǵanyn málim etti.
Biraq ol Qazaqstannyń kompanııanyń úlesin satyp alýda basym quqyǵy bar ekenin eske saldy.
— 2025 jyldyń aıaǵynda «Lýkoıldyń» Qazaqstandaǵy aktıvteri satylǵan jaǵdaıda, zańda kórsetilgendeı, bul úlesti satyp alýǵa basym quqyǵymyz bar ekenin málimdegen edik. Energetıka mınıstrligi tıisti hatty OFAC-qa joldady, - dedi mınıstr.
Osy oraıda vedomstvo basshysy onyń úlesin satyp alýdyń túrli nusqasy bar ekenin naqtylady.
— Satyp alý kezinde mindetti túrde qolma-qol tólem jasaý mindetti emes. Aktsııalar paketin satyp alýdyń ártúrli joldary bar, sonyń ishinde tólemdi keıinge qaldyrý nemese shıkizatty satýdan túsetin kiris arqyly eseptesýge bolady. Kóptegen nusqa bar jáne olardyń barlyǵyn qarastyrý múmkindigi bar, - dedi Erlan Aqkenjenov.
Eske salsaq, Energetıka mınıstriniń orynbasary Sanjar Járkeshov Úkimet otyrysynan keıin ótken baspasóz máslıhatynda sanktsııaǵa túsken «Lýkoıldyń» Qazaqstandaǵy jobalary týraly pikir bildirgen edi.