Qazaqstandaǵy qurylys materıaldarynyń baǵasy qansha
ASTANA. KAZINFORM – Elimizdiń óńirlerinde qurylys materıaldarynyń baǵasynda edáýir aıyrmashylyq bar. Kazinform agenttiginiń tilshisi jobamen smeta jasap, úı salý shyǵyny qaı qalada arzan ekenin bildi.
Mamyr aıynda adamdar tabıǵat aıasynda tynyǵyp qana qoımaı, jaıly ómirdiń qamyna kirisedi. Otbasy músheleri aldaǵy kúnderdi josparlap, qajet bolsa qurylystyń shyǵynyn esepteıdi. Ásirese úı salyp, kúzge deıin jaıly baspanasyna kirip alýdy oılaǵan qazaqstandyqtar ár kúnin qalt jibermeıdi. Іrgetasyn quıyp, qabyrǵasyn qalap, shatyryn japsa, ishki árleý jumystaryna da dereý kirise alady. Qajetti qarjy kólemin dál anyqtaý úshin aldymen qurylys materıaldarynyń baǵasyna sholý jasaıdy.
Negizgi qurylys materıaldarynyń baǵasy maýsymdyq suranysqa baılanysty ózgerip otyrady. Úı qurylysyna qansha qarjy jumsaıtynyn bilý úshin biz «qurylys materıaly sebetin» ázirledik.
Úı qurylysyna qajetti materıaldar tizbesi
Shaǵyn úıden bastap kottedj qurylysynyń baǵasyna taldaý jasaý úshin asa qajetti bes materıaldy tańdadyq.
M150 kirpishi. Qansha ýaqyt ótse de synnan múdirmeı ótti. Sapasy myqty ári jylýdy jaqsy saqtaıdy. Baǵasy qoljetimdi bolǵan soń adamdar jeke úıdiń qurylysy kezinde jıi qoldanady.
M200 markaly beton. Bul qurylystyń dińgegi sanalady. Úı irgetasyn qalaǵanda, edendi tegistegende, baspaldaq salǵanda jáne bekitkende óte qajetti qurylys materıaly.
Armatýra (12 mm, A3 klasty). Kez kelgen ǵımarattyń qańqasyna salynady. Biz adamdar jıi qoldanatyn, temirbeton konstrýktsııasyn myǵym ustap turatyn dıametrdi tańdadyq.
Arqalyq aǵash (100×100 mm, uzyndyǵy 6 m). Muny shatyr jabyndysyna, monshaǵa jáne úı aldyndaǵy sákige qoldanýǵa bolady. Ekologııalyq taza qurylys materıaly adamǵa jaılylyq syılaıdy.
Jylý saqtaıtyn qaptama (50 mm). Jaıly úıge qajetti materıal. Qysta jyly, jazda qońyrsalqyn bolýy úshin qurylys kezinde jıi qoldanady. Sonymen birge artyq dybysty basýǵa kómektesedi.
Elimizde kirpish baǵasy ár danasyna esepteledi. Biz orta eseppen 500 dana kirpish qajet dep sanadyq. Baǵasyn salystyrý kezinde birneshe habarlamany qarap, eń tıimdi usynysqa basymdyq berildi.
Betonǵa qajetti qospany usynýshylar ár tekshe metrin esepteıdi. Al armatýra satatyn adamdardyń usynysy ártúrli (metr, danasy, tonnasy). Sondyqtan biz ortaq esepti shyǵaryp, 100 keliniń (shamamen 114 metr bolady) baǵasyn bildik.
Al aǵash pen qamtamany tańdaý kezinde 10 dana taqtaı men 10 orama jylý saqtaıtyn qurylys materıalynyń baǵasy esepteldi.
Qurylys sebetiniń reıtıngi
Elimiz boıynsha Aqtaý qalasynda qurylys jumystary qymbatqa shyǵyp tur. Shamamen – 313 750 teńge. Eń negizgi sebep – logıstıka. Qurylys materıaldaryn satatyn bazarlar úshin Mańǵystaý oblysy «aralǵa» teń. Sebebi munda barlyq derlik qurylys materıaly basqa oblystardan tasymaldanady. M150 kirpishin tabý qıynǵa soqty. Kóbi munda jergilikti jerde óndiriletin ulytas kirpishin qoldanady. Sonymen birge aǵash pen jylý saqtaıtyn qaptama baǵasy da joǵary. 10 taqtaıdy 81 000 teńgege satyp alady. Elimiz boıynsha eń joǵary baǵa osy. Al 10 dana jylý saqtaý qaptama baǵasy – 107 500 teńge.
Atyraý qalasynda úı qurylysyna qajetti qarjy - 294 950 teńge. Munda beton qospasynyń baǵasy qymbat. Ár tekshe metri – 47 200 teńge. Baǵaǵa iri óndiristik qurylys pen materıaldyń syrttan tasymaldanýy áser etip tur. Armatýra baǵasy rekordtyq kórsetkishke jetip, 100 kelisi 39 000 teńge boldy. Munda tek aǵash baǵasy tómen.
Almaty qalasynda qurylysqa orta eseppen 279 250 teńge jumsaýǵa bolady. Munda quny rekordtyq kórsetkishke jetpese de elimizdegi ortasha baǵaǵa qaraǵanda biz tizbektegen qurylys materıaldary qymbatqa soǵady. Aǵash baǵasy logıstıkaǵa baılanys bolyp tur. Sonymen birge metall men jylý saqtaıtyn qaptama quny joǵary. Bir ǵana 10 dana jylý saqtaıtyn qaptama baǵasy 93 500 teńge. ıAǵnı tizim basynda turǵan qaladan keıingi orynǵa jaıǵasty.
Jezqazǵan men Taldyqorǵan qalalaryna da logıstıka áser etip tur. Alǵashqysynda qurylysqa 268 500 teńge, ekinshisinde 263 750 teńge jumsalady. Jezqazǵanǵa qurylys materıaldarynyń kóbi Qaraǵandy, Astanadan, al Taldyqorǵanǵa Almaty bazarynan tasymaldanady.
Qurylys shyǵyny Qostanaı men Qyzylorda qalalarynda qaraılas. Shamamen 258 500 jáne 257 250 teńge. Qostanaı qalasynda 500 dana kirpish baǵasy 57 500 teńgege shyǵady. Al Qyzylordada aǵashtyń 10 danasyn 78 000 teńgege satyp alýǵa bolady. Іri óndiris orny bolǵanyna qaramastan munda aǵash tapshylyǵy máselesi sheshilmeı tur.
Óskemen (256 250 teńge) men Kókshetaý (250 500 teńge) qalalarynda baǵa ortasha. Shyǵysta aǵash bar, biraq kirpish pen jylý saqtaıtyn qaptama baǵasy óńirdi ortasha deńgeıde ustap tur. Al Kókshetaýda beton qospasynyń baǵasy tómen, esesine armatýranyń 100 kelisi 33 500 teńge.
Qonaev qalasy ózgelerden erek bolyp tur. Jalpy qurylysqa 243 750 teńge jumsalady. Munda beton qospasynyń baǵasy tómen. Tekshe metrine – 19 750 teńge. Jergilikti karerler kómek beredi. Qum, qıyrshyq tas jáne beton daıyndaý toraby qarastyrylǵan. Soǵan qaramastan jańa oblys ortalyǵyndaǵy qurylys qarqyny baǵaǵa áser etpeı qoımady.
Petropavl qalasy (241 000 teńge) men Túrkistan (240 100 teńge) bir-birinen alysqa uzap ketpedi. Soltústikte aǵash arzan bolǵanymen, armatýra baǵasy joǵary. Túrkistanda beton, kirpish baǵasy qoljetimdi, al aǵashty syrttan tasymaldaıdy.
Semeı qalasynda qurylysqa 237 150 teńge jumsaıdy. Munda kirpish shyǵaratyn zaýyt bar jáne shyǵystan aǵash tasymalaıdy. Qurylys materıaldary óz ishinen tabylsa, kórshiles oblystan ákelse baǵa sharyqtamaıdy.
Astana (234 020 teńge) men Taraz (233 650 teńge) qalasynda baǵa qoljetimdi bolyp shyqty. Astanada básekelestik joǵary. Baǵaǵa da oń áserin tıgizedi. Taraz qalasynda jergilikti taýardy tutynady. Munda kirpish pen beton qospasynyń baǵasy tómen. Soǵan qaramastan ońtústik óńirlerde aǵashtyń baǵasy ózgege qaraǵanda joǵary bolyp qala beredi.
Shymkent (232 900 teńge) jáne Pavlodar (232 500 teńge) qalalarynda baǵa odan da tómen. Elimiz boıynsha kirpish baǵasy Shymkent qalasynda arzan. 500 danasy – 36 250 teńge. Pavlodarda da ındýstrıaldy bazada kirpish pen aǵash shyǵarady.
Oral qalasynda qurylysty 230 000 teńgege bastaýǵa bolady. Munda aǵash, metaldy ımporttaıdy. Sonymen birge kirpish shyǵaratyn zaýyt ta bar. Bári baǵaǵa oń áser tıgizdi.
Elimizde Qaraǵandy qalasynda da qurylys arzanǵa shyǵady. Shamamen – 223 500 teńge. Munda Temirtaý qalasy jaqyn. Ol jaqtaǵy qurylys materıaldary zaýytynan qajettini tasymaldaýǵa bolady. Temirjol arqyly kirpish, beton men metall ákeledi. Jaqyn ári tıimdi tasymal joly osy.
Elimiz boıynsha qurylysqa eń ońtaıly jer – Aqtóbe qalasy. Úı qurylysy – 194 750 teńge. Úıdiń negizin salýǵa ketetin shyǵyn munda 200 myń teńgege de jetpeıdi. 500 dana kirpish baǵasy 30 750 teńge, 10 aǵash 50 000 teńge, 10 qaptama 61 500 teńge. Qurylys materıaly eń qymbat qalamen aradaǵy aıyrmashylyq 119 000 teńgege jetti.
Buǵan deıin Qazaqstanda mektep túlekteri sońǵy qońyraýǵa qansha teńge jumsaıtyny týraly jazyldy.
Sonymen birge velosıped pen samokatty jalǵa alý qunyn bildik.
