Qazaqstandaǵy konstıtýtsııalyq reformalar Ortalyq Azııa úshin de mańyzdy — Ózbekstan sarapshylary
TAShKENT. KAZINFORM — Qazaqstannyń Ózbekstandaǵy elshiliginde Prezıdent Qasym-Jomart Toqaev bastamashy bolǵan konstıtýtsııalyq reformalardy talqylaýǵa arnalǵan konferentsııa ótti, dep habarlaıdy Kazinform agenttiginiń menshikti tilshisi.
Іs-sharaǵa ózbekstandyq depýtattar, memlekettik organdardyń basshylary, beldi sarapshylar men BAQ ókilderi qatysty. Olar besinshi Ulttyq Quryltaıda Memleket basshysy kótergen bastamalardyń mańyzyn talqylap, óńirlik ıntegratsııany nyǵaıtý múmkindikterin qarastyrdy. Saıasattanýshylardyń atap ótýinshe, Qazaqstandaǵy aýqymdy reformalar tek ishki emes, sondaı-aq syrtqy saıası baǵdardyń keleshek kelbetin qalyptastyrýǵa baǵyttalǵan.
— Qazaqstanda qolǵa alynǵan konstıtýtsııalyq reformany óte mańyzdy qadam dep sanaımyz. Bul ózgerister eldiń áleýmettik, ekonomıkalyq damýyna serpin berip, qoǵamdyq sanany jańǵyrtýǵa yqpal etedi. Konstıtýtsııalyq reformanyń nátıjesinde Qazaqstan turaqty damýǵa bet alady. Tıisinshe, biz baýyrlas elde bolyp jatqan oń ózgeristerge qoldaý bildiremiz, — dep pikir qosty Ózbekstan Zań shyǵarý palatasynyń depýtaty Dılorom Faızıeva.
Al Strategııalyq jáne óńiraralyq zertteýler ınstıtýty dırektorynyń birinshi orynbasary Akramjon Nematov Memleket basshysy usynǵan saıası ınstıtýtsıonaldyq jańǵyrý bastamasyna toqtaldy.
— Meniń pikirimshe, bul bastama yqshamdy, ashyq jáne esep beretin memlekettik apparatty qalyptastyrýǵa baǵyttalǵan. Protsesterdi tsıfrlandyrý, naqty nátıjege baǵdarlaý, memlekettik basqarý sapasyn arttyrý eldegi josparlanǵan reformalardy tıimdi iske asyrýǵa múmkindik beredi. Kúshti ári yqpaldy ınstıtýttardy qalyptastyrmaı, ekonomıkalyq ilgerileý bolmaıtyny belgili, — dedi Akramjon Nematov.
Sondaı-aq, sarapshylar Qazaqstannyń bir palataly Parlament modeline kóshý josparyna erekshe nazar aýdardy. Olardyń pikirinshe, bul — zań jobalaryn sapaly saralap, olardy óz ýaqytynda qabyldaý mehanızmin júıeleıdi.
— Bul úrdis mańyzdy zańnamalyq aktilerdi qabyldaýdy jedeldetýge yqpal etedi. Búginde normatıvtik-quqyqtyq qujattardy tez arada qarap, maquldaý ózgerip jatqan geosaıası jaǵdaıdyń yrǵaǵyna ýaqytyly ilesý degendi bildiredi, — dep málimdedi beldi saıasattanýshy Ravshan Nazarov.
Osy oraıda, jıynda sóz alǵan ózbekstandyq depýtat Ilhom Abdýllaev saıası ózgerister memlekettik basqarý júıesin ońtaılandyryp, eldiń erkin damýyna jol ashatynyn aıtty.
— Qazaqstan Prezıdentiniń «Zań men Qoǵam» modeli jańa ádil qoǵam qurýǵa áser etti. Bizdiń memleket basshymyz da osy qaǵıdattardy ustanady. Meniń oıymsha, bul bastama eldiń erkin damýyna, ekonomıkalyq josparlardy oryndap, ınvestıtsııa tartý jolynda taptyrmas qural, — dedi Ózbekstan Zań shyǵarý palatasynyń depýtaty Ilhom Abdýllaev.
Sarapshylardyń paıymynsha, Qazaqstandaǵy konstıtýtsııalyq reformalar Ortalyq Azııa aımaǵy úshin de mańyzǵa ıe. Tıisinshe, is-sharaǵa jınalǵandar qazaq-ózbek qarym-qatynasyn odan ári nyǵaıtýǵa qajetti usynystar ázirleýge ýaǵdalasty.