Qazaqstandaǵy qonaqúı jáne demalys oryndarynyń sany kóbeıdi
ASTANA. KAZINFORM — Eldegi ornalastyrý oryndarynyń sany bir jylda 192-ge artty, dep habarlaıdy Ulttyq statıstıka bıýrosynyń baspasóz qyzmeti.
QR Ulttyq qaýipsizdik komıtetiniń Shekara qyzmetiniń derekteri boıynsha, 2026 jyldyń alǵashqy úsh aıynda Qazaqstanǵa 3 mıllıon týrıst kelgen. Al osy kezeńde shetelge 2,47 mıllıon qazaqstandyq shyqqan.
1 sáýirdegi jaǵdaı boıynsha eldegi qonaqúı, demalys bazasy men basqa da ornalastyrý oryndarynyń sany 4 505-ke jetti. Bul ótken jyldyń sáıkes kezeńimen salystyrǵanda 192 nysanǵa kóp.
— Birinshi toqsanda ornalastyrý oryndary 2 mıllıon qonaqqa qyzmet kórsetti. Onyń ishinde 802 myńnan astam adam Qazaqstannyń kýrorttyq aımaqtarynda demalǵan. Qańtar-naýryz aılarynda qonaqúıler men ózge de ornalastyrý oryndarynyń kórsetken qyzmet kólemi 69,4 mlrd teńgeni qurap, byltyrǵy osy kezeńmen salystyrǵanda 13,9 paıyzǵa ósti, — delingen bıýro taratqan aqparatta.
Elimizde qazirgi ýaqytta 23 bes juldyzdy qonaqúı jumys isteıdi. Olar birinshi toqsanda 158 myń qonaqty qabyldaǵan. Sondaı-aq 45 tórt juldyzdy qonaqúıde 113,5 myń adam, al 26 úsh juldyzdy qonaqúıde 58,9 myń adam ornalasty.
Budan buryn elde jańa halyqaralyq qonaqúı jobalary iske asyrylýy múmkin ekenin jazǵanbyz.
