Qazaqstandaǵy kınoapta: jańa mýltfılmder, ertegiler men dramalyq týyndylar
ASTANA. KAZINFORM — Osy aptada Qazaqstan kınoteatrlarynda anımatsııalyq shytyrman oqıǵalardan bastap otbasylyq ertegilerge, mýzykalyq drama men tartysty trıllerge deıingi birqatar jańa fılm prokatqa shyǵady, dep habarlaıdy Kazinform tilshisi.
Trı bogatyrıa ı svet klınom
Kórermender súıikti mýltkeıipkerler — batyrlardyń jańa oqıǵasyn tamashalaıdy. Batyrlar otbasynda qýanyshty jańalyq kútip otyrǵanymen, taǵy da týǵan knıazdikti qorǵaýǵa májbúr bolady. Rýs jerin tylsym bult torlap, búkil álemdi qarańǵylyqqa batyrý qaýpi tónedi. Osy sátti paıdalanǵan aılaker kópes Kolyvan Baba ıAganyń mańaıyndaǵy zulymdarmen birigip, knıazdikke shabýyl jasaıdy. Batyrlar Knıazdi, qalany jáne adal serigi ıÝlıı degen atty qutqarýǵa attanady.
Melodııa ıh mechty
Mýzykalyq dramany súıetin kórermenge arnalǵan bul fılm AQSh-tyń Mılýokı qalasynda turatyn erli-zaıypty Maık pen Klerdiń ómirin baıandaıdy. Maık úlken sahnany armandaıdy, al Kler qalyptasqan ómir sheńberinen shyǵýdy qalaıdy. Nıl Daımondtyń shyǵarmashylyǵynan shabyt alyp, dýet qurǵan jup alǵashqy óner kórsetýden bastap tabysqa deıingi jolda mahabbat, úmit pen aýyr synaqtarǵa tap bolady. Kartına arman men seriktestiktiń kúshin kórsetedi.
Býratıno
Otbasylyq kórermenge arnalǵan klassıkalyq erteginiń jańa ınterpretatsııasy ekranǵa jol tartady. Papa Karlonyń qolyna kez kelgen tilekti oryndaıtyn sıqyrly kilt túsedi. Uldy bolýdy armandaǵan sheberdiń tilegi qabyl bolyp, jan bitken bóreneden aǵash bala Býratıno paıda bolady. Úlken saparǵa attanǵan keıipker óziniń shynaıy ári súıispenshilikke laıyq ul ekenin dáleldeýge tyrysady.
Chebýrashka
Chebýrashka jaıly hıkaıa da jalǵasyn tabady. Bir jyl ótken soń ol eseıip, derbestikke umtylady, bul Gena ekeýiniń arasyndaǵy qarym-qatynasqa áser etedi. Týǵan kúndegi kútpegen jaǵdaı balalardyń taýǵa qashýyna sebep bolady. Alda olardy qaýipti shytyrman oqıǵalar kútse, eresekterge bir-birin tyńdap, túsinýdi úırenýge týra keledi.
Snegovık
Otbasylyq kórermenge arnalǵan basty premeralardyń biri — jańa jyl merekesi qarsańynda órbıtin ertegilik fılm. Sıqyrly álemde Aıaz atanyń kúshi álsireı bastaıdy. Osyny paıdalanǵan zulym Vıýga adamdar álemine attanyp, jer betin máńgilik aıazǵa aınaldyrýdy kózdeıdi. Adamdardy qutqaratyn jalǵyz úmit — Varıa esimdi qyz jasaǵan tiri snegovık. Olar birge ejelgi sıqyr kózin taýyp, ýaqyt jumbaqtaryn sheship, merekeni qaıta oraltýy tıis.
Ohota na rozovogo zaıtsa
Premeralar qataryn qazaqstandyq dramalyq fılm túıindeıdi. Kartına áskerden oralǵan jas desantshy Mıras týraly baıandaıdy. Ol kútpegen jerden «altyn jastardyń» qaýipti ortasyna tap bolady. Qala syrtyndaǵy keshte bolǵan oqıǵalar onyń ómirin kúrt ózgertip, tańdaý jasaýǵa májbúrleıdi: bárine beıjaı qaraý nemese shyndyq úshin sońyna deıin barý.
Aıta keteıik, ótken apta otandyq jáne sheteldik jańa fılmdermen qýantqan edi. Komedııadan bastap ekshn, anımatsııa men mýzykalyq kınoǵa deıingi túrli janrdaǵy týyndylar kórermen nazaryna usynyldy.