Qazaqstandaǵy kásipkerlerdiń 48,1% — áıelder
ALMATY. KAZINFORM – Byltyr Qazaqstanda 1 mln-nan asa áıel shaǵyn jáne orta bıznesti basqarǵan, bul shaǵyn jáne orta kásipkerlik (ShOK) sýbektileriniń jalpy sanynyń 48,1%-yn quraıdy, dep habarlaıdy UEM baspasóz qyzmeti.
Áıelder ekonomıkanyń túrli sektorlarynda, ásirese saýdada, bilim berýde, sulýlyq ındýstrııasynda, áleýmettik baǵdarlanǵan jobalarda kásipkerlik qyzmetpen belsendi aınalysýda.
ShOK basqaratyn áıelderdiń basym bóligi Qazaqstannyń iri qalalarynda tirkelgen. Shaǵyn jáne orta bıznesti Almatyda 174 851 áıel, al Astanada 121 203 áıel basqarady. Sońǵy jyldary ekologııalyq turaqtylyq pen áleýmettik mańyzy bar jobalardy tańdaıtyn áıelder sanynyń ósýi baıqalady, bul álemdik trendterge jáne ornyqty damýdyń memlekettik saıasatyna sáıkes keledi.
Qazaqstan áıelder kásipkerligin damytý úshin belsendi jaǵdaı jasaýda. Sonyń bir mysaly, jumys isteıtin áıeldermen qatar, kópbalaly jáne jalǵyzbasty analarǵa arnalǵan «Umaı» jeńildikti ıpotekalyq baǵdarlamasy.
Budan bólek, «Damý» Qory arqyly iske asyrylatyn «Úmit» memlekettik baǵdarlamasy kásibin jańadan bastaıtyndarǵa granttar, sýbsıdııalar, sondaı-aq bilim berý kýrstary men konsýltatsııalar usynady. Áıelder buǵan qosa Business Qymyz tegin onlaın baǵdarlamasyn paıdalyp, granttar alý úshin Coca-Cola Belesteri» baıqaýyna qatysa alady.
2015 jyldan bastap QR Ulttyq ekonomıka mınıstrligi men Eýropalyq qaıta qurý jáne damý banki (EQDB) áıelder kásipkerliginiń básekege qabilettiligin arttyrýǵa baǵyttalǵan «Bıznestegi áıelder» baǵdarlamasyn iske asyrýda. Baǵdarlama aıasynda 521 konsaltıngtik jáne koýchıngtik joba, «Mıkrobıznestegi áıelder» onlaın baǵdarlamasy arqyly 7,5 myńnan astam áıel oqytyldy. Sonymen birge EQDB áıelderdiń ShOB nesıeleý úshin 6 qarjy ınstıtýtyna 212 mln AQSh dollaryn berdi.
TalpynUP, Dell Women’s Entrepreneur Network baǵdarlamasy, sondaı-aq Mastercard jáne EQDB-men seriktestikte 2025 jylǵy 6-23 naýryz aralyǵynda bastalatyn «Business-Aru» jobasy sııaqty bastamalar áıelderge qosymsha qoldaý kórsetedi. Bul joba arqyly áıelder qarjy, marketıng, satý jáne bıznesti basqarý boıynsha tegin bilim alyp, ózderiniń bıznes-josparyn jasaıdy.
Qazaqstandaǵy áıelder kásipkerligin qoldaý sharalary shaǵyn jáne orta bıznesti damytýǵa yqpal etip qana qoımaıdy, sonymen qatar «Genderlik teńdikti qamtamasyz etý jáne barlyq áıelder men qyzdardyń quqyqtary men múmkindikterin keńeıtý» ornyqty damý maqsatyna qol jetkizýge eleýli úles qosady.
Áıelder kásipkerligin qoldaý baǵdarlamalaryn damytý, qarjylandyrýǵa qol jetkizý, sondaı-aq oqytý men tálimgerlik áıelder úshin qosymsha múmkindikter týǵyzady ári Qazaqstanda genderlik teńdikke qol jetkizýdegi progresti jedeldetedi.
Buǵan deıin Qazaqstandaǵy azamattyq avıatsııa mamandarynyń 40 paıyzy – áıelder ekeni aıtyldy.