Qazaqstandaǵy ınternet problemalary tutynýdyń artýymen baılanysty — Prezıdent kómekshisi
ASTANA. KAZINFORM — Qazaqstan Prezıdentiniń kómekshisi Qýanyshbek Esekeev qazaqstandyqtardyń mobıldi baılanys pen ınternet sapasyna qatysty shaǵymdaryna pikir bildirip, trafık tutynýdyń ósýine baılanysty jelilerge túsetin júkteme artyp jatqanyn aıtty.
Spıkerdiń aıtýynsha, ınternet pen mobıldi baılanys sapasyna qatysty shaǵymdar, ásirese óńirlerde, tas joldarda jáne aýyldyq jerlerde jıi kezdesedi. Tipti Astananyń ózinde azamattar baılanystyń úzilýine jıi shaǵymdanady.
— Búkil álemde trafık kólemi óte qarqyndy ósip jatyr. Jańa baılanys standarttary engizilgenimen, jelilerge túsetin júkteme de jyldam artyp otyr. Buryn paıdalanýshylarǵa SMS jetkilikti bolsa, búginde olar YouTube, messendjerler, ınternetpen qońyraý shalý, beınetranslıatsııalar men jelidegi kontentti belsendi qoldanady. Munyń bári orasan zor resýrstardy talap etedi. Ókinishke qaraı, qajettilikterdiń ósýine ınfraqurylym árdaıym ilese bermeıdi. Sonyń saldarynan baılanys sapasy, ásirese óńirlerde ózekti másele bolyp qalyp otyr. Qazir tutynýshylar 5G tehnologııasyna da úırenip ketti. Tipti qandaı tehnologııany paıdalanyp júrgenderin de baıqamaıdy, — dedi Qýanyshbek Esekeev Jibek Joly arnasynyń «Ýáde» baǵdarlamasynda.
Spıkerdiń aıtýynsha, telekommýnıkatsııany damytý — tehnologııa máselesi ǵana emes, ádil qoljetimdilik pen teńdik máselesi. Sondyqtan strategııalyq josparlarda aýyldyq aımaqtar men shaǵyn qalalarǵa erekshe nazar aýdarylyp otyr.
Sonymen birge, Qýanyshbek Esekeev 6G tehnologııasy jasandy ıntellekt kómegimen ázirlenip jatqanyn jáne 2030 jyldan keıin paıda bolýy múmkin ekenin habarlady.
— Ol jasandy ıntellekt negizinde jumys isteıdi, ıaǵnı sizdiń trafıgińiz birden jiktelip, jelide shamadan tys júkteme bolmaýyna múmkindik beredi, — dep túıindedi Qýanyshbek Esekeev.
Aıta keteıik, tamyz aıynan bastap 500 mektepte jasandy ıntellektini pılottyq túrde engizý bastalady.
