Qazaqstandaǵy ınflıatsııa: qaı óńirlerde baǵa ósimi jedeldedi

ASTANA. KAZINFORM — Mamyr aıynda elde jyldyq ınflıatsııa jedeldep, 11,3% boldy (sáýirde — 10,7%). Jyldyq ınflıatsııa 16 óńirde jedeldedi, 3 óńirde baıaýlap, 1 óńirde burynǵy deńgeıde saqtaldy. Bul týraly Ulttyq bank málim etti.

Jyldyq ınflıatsııanyń 13,0%-dyq eń joǵary máni Almaty qalasynda tirkeldi.

— Mamyrda azyq-túlik taýarlarynyń baǵasy jyldyq mánde 9,6%-ǵa deıin jedeldedi (sáýirde — 8,5%). Osy topqa jatatyn taýarlar baǵasy Aqmola oblysynda (11,4%) eń joǵary, al Almaty qalasynda (8,0%) tómen ósim kórsetti, — delingen habarlamada.

Mamyrda azyq-túlikke jatpaıtyn taýarlar baǵasynyń ósimi jyldyq mánde 9,0%-ǵa jetti (sáýirde — 8,9%). Eń joǵary mán Túrkistan oblysynda (14,2%), eń tómengi mán Pavlodar oblysynda (5,4%) tirkeldi.

Mamyrda aqyly qyzmetterdiń baǵasy jyldyq mánde 16,0%-ǵa deıin ósti (sáýirde — 15,7%). Sonymen qatar Almaty qalasynda (22,5%) baǵa jalpy respýblıkalyq deńgeıden joǵary, Almaty oblysynda (11,3%) aıtarlyqtaı tómen ósim tirkeldi.

Mamyrda aılyq ınflıatsııa elde 0,9%-ǵa ósti.

Aıta keteıik, buǵan deıin Tımýr Súleımenov úsh jyldyq ınflıatsııa boljamyn jarııalaǵan bolatyn.