Qazaqstandaǵy farmnaryqtyń 84 paıyzy — sheteldik ónim
ASTANA. KAZINFORM — Qazaqstanda byltyr farmatsevtıkalyq naryqtyń kólemi 1,2 trln teńgeni quraǵan. Al onyń 84 paıyzy sheteldik ónim.
Bul týraly QR Joǵary aýdıtorlyq palatasynyń tóraǵasy Álıhan Smaıylov aıtty.
— 2024-2025 jyldary júrgizilgen eki aýdıt dári-dármekpen qamtamasyz etý júıesinde birqatar kemshilikti anyqtady. Birinshi, otandyq farmatsevtıkanyń nashar damýy. Qazaqstandaǵy farmatsevtıkalyq naryqtyń kólemi 2024 jyly 1,2 trln teńgeni qurasa, onyń 84 paıyzy sheteldik ónim, — dedi Joǵary aýdıtorlyq palatasynyń tóraǵasy Májilistiń jalpy otyrysynda.
Sondaı-aq ol 2022-2024 jyldary medıtsına ǵylymyn qarjylandyrýǵa 58 mlrd teńge jumsalǵanyn aıtty.
— Ǵylymı jumystar sany az bolsa da, Densaýlyq saqtaý mınıstrligi Ǵylym jáne joǵary mınıstrligi tarapynan iske asyrylatyn zertteýlerden habarsyz. Bul naqty qajettilikterdi eskere otyryp, ǵylymı basym baǵyttardy naqtyly túzetýge múmkindik bermeıdi, — dedi Álıhan Smaıylov.
Buǵan deıin Májilis Joǵary aýdıtorlyq palata tóraǵasynyń esebin tyńdaıtyny habarlanǵan edi.