Qazaqstandaǵy farmatsevtıka ǵylymynyń negizin qalaýshy Keńesbaı Úshbaev ómirden ótti
ALMATY. KAZINFORM — Qazaqstannyń kórnekti ǵalymy, farmatsevtıka ǵylymdarynyń doktory, professor Keńesbaı Úshbaev 86 jasqa qaraǵan shaǵynda qaıtys boldy.
Qaıǵyly habardy S. J. Asfendııarov atyndaǵy qazaq ulttyq medıtsına ýnıversıtetiniń baspasóz qyzmeti jetkizdi.
— S. J. Asfendııarov atyndaǵy qazaq ulttyq medıtsına ýnıversıteti Qazaqstannyń farmatsevtıka ǵylymy men bilimi jáne dári-dármekpen qamtamasyz etý júıesiniń qalyptasýyna, damýyna úles qosqan ǵalymnyń qaıtys bolýyna oraı qaıǵyra kóńil aıtady, — delingen habarlamada.
Keńesbaı Úshbaev Qazaqstan tarıhynda farmatsevtıka ǵylymdarynyń doktory dárejesin alǵan tuńǵysh qazaq retinde qaldy. 1983 jyly ol Ortalyq Azııadaǵy alǵashqy farmatsevtıka ǵylymdarynyń doktory atanyp, Keńes Odaǵynda osy ǵylymı dárejege ıe bolǵan on ekinshi ǵalym boldy. Bul jetistik otandyq ǵylym tarıhyndaǵy mańyzdy kezeńge aınalyp, farmatsevtıkalyq zertteýlerdi damytýǵa jáne ulttyq ǵylymı kadrlardy daıarlaýǵa jol ashty.
Ǵalym 60 jyldan astam ǵumyryn farmatsevtıka salasynyń damýyna arnady. 1965 jyly Almaty memlekettik medıtsına ınstıtýtyn támamdap, keıin Lvov memlekettik medıtsına ınstıtýtynyń aspırantýrasynda bilimin jalǵastyrdy. Eńbek jolynda oqytýshy, kafedra meńgerýshisi jáne Almaty medıtsına ınstıtýtynyń oqý isi jónindegi prorektory qyzmetterin atqardy.
Ol Qazaqstandaǵy farmatsevtıkalyq mamandyqtar boıynsha alǵashqy dıssertatsııalyq keńestiń qurylýyna atsalysty. Ǵylymı jetekshiligi men keńes berýi arqyly 24 ǵylym kandıdaty jáne úsh farmatsevtıka ǵylymdarynyń doktory daıyndaldy. Ǵalymnyń ǵylymı murasy 150-den astam jarııalanymdy, sonyń ishinde monografııalar men anyqtamalyq basylymdardy qamtıdy.
— Onyń Qazaqstannyń dárilik ósimdikterine, hımııalyq-toksıkologııalyq zertteýlerge jáne farmatsııany uıymdastyrý máselelerine arnalǵan eńbekteri otandyq ǵylymı ádebıettiń damýyna eleýli úles qosty, — dep atap ótti ýnıversıtet ókilderi.
Keńesbaı Úshbaev Qazaq KSR Densaýlyq saqtaý mınıstrliginiń Bas dárihana basqarmasyn da basqarǵan. Bul qyzmette dárihana jelisin damytýǵa jáne halyqty dári-dármekpen qamtamasyz etý júıesin jetildirýge kúsh saldy.
Sonymen qatar ol Almaty memlekettik medıtsına ınstıtýtynyń Shymkent fılıalyn derbes farmatsevtıkalyq ınstıtýt etip qaıta qurýǵa jetekshilik etti. Keıin bul oqý orny Ońtústik Qazaqstan memlekettik medıtsına akademııasynyń negizine aınaldy.
Ár jyldary ǵalym «KSRO densaýlyq saqtaý úzdigi» jáne «Qazaq KSR-niń eńbek sińirgen farmatsevti» ataqtaryna ıe boldy. Sondaı-aq Qazaq KSR Joǵarǵy Keńesiniń depýtaty bolyp saılandy.
Eske salsaq, jazýshy, jýrnalıst Núrıddın Shámshiuly ómirden ótkenin jazǵanbyz.
