Qazaqstandaǵy eńbek kúshiniń shyǵyny Qytaıǵa qaraǵanda tıimdirek — qytaılyq kásipker
ASTANA. KAZINFORM - Elordada Qazaqstan - Qytaı ınvestıtsııalyq yntymaqtastyq forýmy ótti. Dúnıejúzi qazaqtarynyń qaýymdastyǵy men Qytaıdyń Shenchjen qalasy Saýda basqarmasy birlese uıymdastyrǵan forýmda qos taraptyń bıznes pen memlekettik qurylymdarynyń ókilderi ekijaqty ınvestıtsııalyq yqpaldastyq máselelerin jan-jaqty talqylady. Osy sapar aıasynda Qytaı kásipkerleri delegatsııasynyń múshesi Fen Sıýehýeı Kazinform tilshisine suhbat berdi. Aıtýynsha, Qazaqstan saıası jáne ekonomıkalyq turaqtylyǵynyń, sondaı-aq keńeıip kele jatqan naryqtyq áleýetiniń arqasynda qytaılyq kásiporyndardyń nazaryn barǵan saıyn kóbirek aýdaryp otyr.
— Qazaqstanǵa kelgen Qytaı kásiporyndarynyń ókilderi qaı salalarǵa qyzyǵyp otyr?
— Biz negizinen tutynýshylyq elektronıka salasyna basymdyq berip otyrmyz. Bul — Qytaıda jaqsy meńgergen ári tájirıbemiz mol baǵyttardyń biri. Sol sebepti qazirgi tańda bizdiń nazarymyz kóbirek osy sektorda. Degenmen, Ortalyq Azııa naryǵy aýqymdy. Al osy óńir elderiniń ishinde Qazaqstan ekonomıkalyq ári saıası turǵydan erekshe kózge túsedi. Bul bizdiń sheteldik ınvestıtsııaǵa degen múddemizben tolyq úılesedi.
Árıne, naryq keń, orta turaqty bolsa, tek elektronıka ǵana emes, ózge de salalar boıynsha jobalardy qolǵa alýǵa bolady.
— Qazaqstan týraly áserińiz qalaı?
— Shyn máninde, bul — meniń Qazaqstanǵa alǵash ret kelýim. Alǵashqy áserim óte jaqsy boldy. Keshe ǵana kelip, búgin tańerteń qonaq úı mańyn aralap kórdim. Astana órkenıetti qala ekendigi birden sezildi. Máselen, jol qozǵalysynda jaıaý júrginshilerge basymdyq berý mádenıeti Shenchjennen kem túspeıdi.
Tereńirek aıtar bolsam, mundaǵy eńbek kúshi shyǵyny Qytaıǵa qaraǵanda tıimdirek. Sondaı-aq naryq kólemi de zor. Indýstrııalandyrý men ınfraqurylym salasynda kóptegen múmkindik bar. Bul — kásiporyndar úshin zor artyqshylyq.
— Demek, munda sizderdiń jumystaryńyz úshin barlyq qajetti sharttar bar ǵoı?
— Shyn máninde, biz úshin eń bastysy — saıası jáne quqyqtyq turaqtylyq. Erekshe jeńildikterden buryn bizge qajeti — ýádeniń oryndalýy. Qandaı jaǵdaı bolmasyn, qabyldanǵan saıasattyń uzaqmerzimdi ári turaqty túrde júzege asqany mańyzdy. Bul — bızneske beriletin eń úlken kepil. Árıne, eger qosymsha jeńildikter usynylsa, ol bastapqy kezeńdegi ınvestıtsııalyq aýyrtpalyqty azaıtady. Biraq jalpy alǵanda, biz úshin eń baǵalysy — ashyq, turaqty jáne boljamdy bıznes orta.
— Astanada ótip jatqan Qazaqstan — Qytaı ınvestıtsııalyq yntymaqtastyq forýmynan qandaı nátıjeler kútesiz?
— Biz Ortalyq Azııa naryǵyna kóbirek shyǵýdy kózdep júrmiz. Keıbir ónimderimiz bul aımaqqa kirdi, biraq áli de jumysty jetildire túsýimiz qajet. Bul jolǵy saparymyzdyń maqsaty — tek óz kompanııamyz úshin ǵana emes, sonymen qatar bizben baılanysty joǵary jáne tómengi býyndaǵy seriktester úshin de jaǵdaı jasaý.
Keleshekte olar Qazaqstanǵa kelgen kezde bizdiń tájirıbemizge súıene alady. Bul qadam bizge Ortalyq Azııaǵa nyq ornyǵýǵa, ári qaraı Eýropa men álemge shyǵýǵa múmkindik beredi. Qazaqstandaǵy eńbek kúshi men óndiristik shyǵyndardyń qolaılylyǵy, sondaı-aq logıstıkalyq múmkindikter bizge aıtarlyqtaı básekelestik artyqshylyq beredi.
Aıta keteıik, Shenchjen qalasy — Qytaıdyń syrtqy ekonomıkalyq reformalardy alǵash júzege asyrǵan aımaǵy ári ınvestıtsııalyq ortalyq. Ol — eldiń eń iri óndiristik qana emes, jahandyq deńgeıde yqpal etetin tehnologııalyq ınnovatsııalar ortalyǵy. Shenchjen Saýda basqarmasy — atalǵan óńirdegi saýda jáne ınvestıtsııa salasyna jaýapty memlekettik organ.