Qazaqstandaǵy eń uzyn kósheni jóndeý jumystary aıaqtalýǵa jaqyn
ASTANA. KAZINFORM – Jetisý oblysyndaǵy Tekeli qalasynda Qazaqstandaǵy eń uzyn Dinmuhamed Qonaev kóshesine kúrdeli jóndeý jumystary aıaqtalýǵa jaqyn, dep habarlaıdy Kazinform tilshisi.
Sońǵy úsh jylda qalada tórt negizgi ınfraqurylym máselesi sheshildi.
Atap aıtqanda, qazirgi tańda Qonaev kóshesiniń 6 shaqyrymyna kúrdeli jáne taǵy 12 shaqyrymyna ortasha jóndeý jumystary júrgizilip jatyr. Jumystardy aıaqtaý aǵymdaǵy jyldyń qarasha aıyna josparlanǵan. Budan basqa, tasjol jyl sońyna deıin kóshelerdi jaryqtandyrýmen tolyq qamtamasyz etiledi.
- Jumystyń sapaly júrgizilip jatqanyn aıta alamyn. Sonyń nátıjesinde Tekelidegi jaqsy jáne qanaǵattanarlyq jaǵdaıdaǵy joldardyń úlesi 93 paıyzǵa deıin artady, – dep atap ótti aımaq basshysy Beıbit Isabaev.
Sonymen qatar, basqa da mańyzdy mindetter sheshilip jatyr: qalaǵa tabıǵı gaz ótkizildi, búginde 28 myńǵa jýyq turǵyn, ıaǵnı halyqtyń 92 paıyzy kógildir otynǵa qol jetkizdi.
Sondaı-aq, Tekeli qalasynda jyl sońyna deıin apatty jaǵdaıdaǵy 212 páter ıelerin qonystandyrýdy aıaqtaý josparlanyp otyr. Sondaı-aq aýyz sýdyń sapasyn jaqsartý úshin magıstraldyq sý qubyryn jańartý jumystary jalǵasyp jatyr, dep habarlady oblys ákiminiń baspasóz qyzmeti.
Bıyl Tekeli qalasyndaǵy jol jóndeý jumystary aıasynda qala kósheleriniń 19 shaqyrymyn qalpyna keltirýge qarjy bólindi. Atap aıtqanda, Áýezov kóshesinde – ortalyq saıabaqtan dene shynyqtyrý-saýyqtyrý keshenine deıingi ýchaskede ortasha jóndeý jumystary júrgizilip úlgerdi.
Aıta keteıik, jasandy ıntellekt jol sapasyn baqylaıdy.