Qazaqstandaǵy eń úzdik qaraýyl bastyǵy kim
ASTANA. KAZINFORM — «Úzdik qaraýyl bastyǵy – 2026» ataǵyn Almaty ókili jeńip aldy, dep habarlaıdy TJM baspasóz qyzmeti.
Tótenshe jaǵdaılar mınıstrliginiń Órtke qarsy qyzmet komıteti uıymdastyrǵan jáne elimizdiń órt sóndirý bólimsheleriniń úzdik ókilderin biriktirgen «Úzdik qaraýyl bastyǵy» I respýblıkalyq baıqaýy óz máresine jetti.
Eki kún boıy qatysýshylar kásibı bilimin, dene jáne arnaıy daıarlyǵyn, praktıkalyq daǵdylaryn, jaǵdaıdy jedel baǵalaý jáne kúrdeli jaǵdaıda sheshim qabyldaý qabiletterin kórsetti.
Jabylý jáne jeńimpazdardy marapattaý rásimine tótenshe jaǵdaılar vıtse-mınıstri general-maıor Ramıl Kamalov qatysty.
— Barlyq kezeńniń qorytyndysy boıynsha «Úzdik qaraýyl bastyǵy» I respýblıkalyq baıqaýynyń jeńimpazy jáne «Úzdik qaraýyl bastyǵy — 2026» ataǵynyń ıegeri Almaty qalasy TJD № 15 órt sóndirý bóliminiń qaraýyl bastyǵy Dáýren Esenǵalıev atandy. Ekinshi oryndy Abaı oblysynyń № 7 órt sóndirý bóliminiń qaraýyl bastyǵy Tórebaı Orazǵalıev ıelendi. Úzdik úshtikti Pavlodar oblysy TJD № 6 órt sóndirý bóliminiń qaraýyl bastyǵy Temirlan Janybekov túıindedi. «Jeńiske degen jigeri úshin» nomınatsııasy boıynsha arnaıy júldege Jetisý oblysy TJD № 5 órt sóndirý bóliminiń qaraýyl bastyǵy Serjan Moldahýnov ıe boldy. Arnaıy kedergiler jolaǵynan ótý boıynsha úzdik nátıje kórsetkeni úshin arnaıy marapat Qyzylorda oblysy TJD № 14 órt sóndirý bóliminiń qaraýyl bastyǵy Erasyl Ómirzaqqa tabystaldy, — delingen habarlamada.
Respýblıkalyq baıqaýdyń ótkizilýi qaraýyl bastyqtarynyń teorııalyq, dene jáne praktıkalyq daıarlyǵyn, sondaı-aq kásibı sheberligin jetildirýge degen yntasyn arttyrýǵa serpin beredi.
Buǵan deıin TJM mınıstri Aqtóbede shahtaǵa túsip, qaýipti aımaqtan shyǵý baǵyttaryn teksergenin jazǵanbyz.
