Qazaqstandaǵy eń las qalalar ataldy

ASTANA. KAZINFORM – Ekologııa jáne tabıǵı resýrstar mınıstrligi Memlekettik ekologııalyq baqylaý basqarmasynyń bas sarapshysy Almas Ysqaqov elimizdegi aýa tazalyǵyn monıtorıngileý jumystary týraly aıtyp berdi.

«Búginde 45 ónerkásiptik qala men megapolıstiń ishinde eń las qalalar qataryna Astana, Almaty, Qaraǵandy, Temirtaý, Atyraý, Aqtóbe, Óskemen jáne Shymkent jatady. Elimizdegi atmosferalyq aýanyń jaı-kúıin baqylaý respýblıkanyń 69 eldi mekeninde 170 baqylaý beketinde, onyń ishinde 47 qolmen synama alý jáne 130 avtomatty baqylaý beketinde júrgiziledi», - dedi Almas Ysqaqov mınıstrlikte ótken onlaın brıfıngide.

Onyń aıtýynsha, eger Qaraǵandy, Temirtaý, Atyraý jáne taǵy basqa qalalarda aýanyń lastaný sebepteri ónerkásippen baılanysty bolsa, al Astana men Almatyda avtokólikten shyǵatyn shyǵaryndylardyń kóptiginen aýa lastanyp otyr.

«2023 jylǵy Ulttyq statıstıka bıýrosynyń derekteri boıynsha respýblıka boıynsha avtokólik quraldarynyń sany 4 449,3 myń birlik. Onyń ishinde kólikterdiń 50% (2 224,6 myń birlik) jasalǵanyna 20 jyldan asyp ketken. Ótken jyly jeltoqsan aıynda Almatyda 600 myńǵa jýyq avtomobıl tirkelgen, kún saıyn qalaǵa 700 myńnan astam kólik kiredi. Astana qalasy ákimdiginiń aqparatyna sáıkes, elordada 320 myń avtokólik (287,5 myń jeńil avtokólik, 23,5 myń júk kóligi, 6,8 myń avtobýs) tirkelgen, onyń 50% paıdalanǵanyna10 jyldan asqan. Jalpy, qala boıynsha Eýro 4 jáne 5 standartyna sáıkes keletin avtokóliktiń sany 90 myńnan aspaıdy (tirkelgen avtokólik quraldarynyń jalpy sanynyń 28%)», - deıdi spıker.