Qazaqstandaǵy eń bıik kópirdiń qurylysy kelesi jyly aıaqtalady
ÓSKEMEN. KAZINFORM – Shyǵys Qazaqstanda ornalasqan eldegi eń bıik taýly kópirdiń qurylysy jańa qıyndyqtarǵa tap boldy. Endi jobany aıaqtaý merzimi kelesi jylǵa shegerildi. Munyń sebebine Kazinform tilshisi úńilip kórdi.
Altaı aýdanyndaǵy Pıhtovka shatqaly arqyly ótetin kópir Osınov asýyn aınalyp ótetin negizgi jol bolmaq. Uzyndyǵy 175 metrden, al bıiktigi qyryq metrden asady. Kópir daıyn bolǵannan keıin eki jaǵyndaǵy daıyn jol ýchaskelerin biriktiredi.
- Kópir paıdalanýǵa berilgennen keıin halyq qaýipsiz jolmen júretin bolady. Ondaǵan jyl boıy adamdar ásirese qysta jol azabyn tartyp kelgen. Sol úshin eń áýeli kópir sapaly bolýy tıis. Sebebi taýly aımaq bolǵannan keıin aýa temperatýrasy qubylyp turady. Biz barlyq jumystyń joǵary deńgeıde oryndalýyn jiti qadaǵalap jatyrmyz, - dedi «Kazavtojol» UQ ShQO fılıalynyń dırektory Nurbek Temirhanov.
Qurylystyń taǵy da ýaqyly bitpeýine kópir tireýlerin ornatýǵa shuńqyrlar qazǵan kezdegi jer qabatynyń birtekti bolmaýy sebep bolyp otyr. Bastapqyda geologtar shatqaldaǵy jer qabaty birqalypty dep eseptegen. Alaıda qurylys bastalǵanda jerdiń asty tegis bolmaı shyqty. Sol sebepti kópirdiń irgetasyn jobadaǵydan tereńirek ornatý qajet bolǵan.
- Biz jobalaý barysynda tirekterdi ornatý úshin tórt metrden artyq qazylmaıdy dep esteptegenbiz. Al iske kelgende on metrge, tipti keıbir jerlerinde odan da tereń shuńqyr qazýǵa týra keldi. Sebebi biz mejelegen tereńdikte qum, saz nemese bos qýystar kezdesti. Al tireýdi álsiz qabatqa ornata almaımyz, sondyqtan ári qaraı tereńdep qazdyq, - deıdi merdiger mekeme basshysy Aleksandr Andreıchýk.
Óz sózinde ol jobalaýshylar mundaı erekshelikterdi aldyn ala boljaı almaıtyndyǵyn jetkizdi. Osyndaı máseleler árkez qazý jumystary bastalǵanda shyǵa bastaıdy. Qazir barlyq tirekter berik tur, tutastaı monolıttan quıyldy. Bul óte senimdi konstrýktsııa.
Qatelikterdi qaıtalamas úshin Jol aktıvteri sapasy ulttyq ortalyǵynyń ınjenerleri jıi tekseris jasap turady. Mamandar betonnan, materıaldardan synama alyp, beriktigin tekseredi.
- Bul kópirdiń qurylysy kúrdeli. Soǵan oraı biz sapaly jumys bolýy úshin ár kezeń saıyn tekseris jasap otyramyz. Kez kelgen kishkentaı qateliktiń ózi úlken qıyndyqqa ákep soǵýy múmkin. Betondardyń beriktigin, aıazǵa tózimdiligin, tyǵyzdyǵyn tekseremiz. Normaǵa sáıkes jasalynbaǵan tusy bolsa merdiger kompanııa qaıta jasaýǵa mindetti. Kópirdi tez jasap, keıin qaıta jóndeýden ótkizip jatqansha, qazir ýaqytty aıamaı sapaly jumysqa qol jetkizýimiz kerek, - dedi ortalyqtyń ShQOF dırektory Saıahat Mýsapyrov.
«QazAvtoJol» AQ ShQO fılıalynyń málimetinshe, Osınov asýyn aınalyp ótetin jol qurylysy jobasynyń jalpy quny shamamen 13,2 mlrd teńgeni quraıdy.
Eske salsaq, osyǵan deıin Óskemen qalasyndaǵy Ertis kópiri astyndaǵy joldy bıyl ashý josparlanyp otyrǵany habarlanǵan.