Qazaqstandaǵy eń arzan jáne qymbat qazy qaıda satylady
ASTANA. KAZINFORM — Qazy — qazaq dastarqanynan erekshe oryn alatyn ulttyq taǵamnyń biri. Alaıda onyń baǵasy elimizdiń ár óńirinde ár túrli. Kazinform tilshileri Qazaqstannyń 20 qalasyndaǵy saýda oryndaryndaǵy baǵaǵa sholý jasap, qazyny qaı aımaqta tıimdirek satyp alýǵa bolatynyn anyqtady.
Petropavl bazarlaryndaǵy qazynyń bir kelisiniń baǵasy 4 000 teńgeden bastalady. Ol eń aldymen ettiń maılylyǵyna baılanysty. Al mamandandyrylǵan dúkenderde ónimniń kelisi 5 000 teńgeden satylady. Ystalǵan qazynyń ortasha baǵasy — 7 000 teńge.
Qazynyń eń qoljetimdi baǵalarynyń biri Túrkistanda tirkelgen. Munda delıkatestiń bir kelisi 4 200-4 300 teńge turady. Al Jezqazǵanda onyń baǵasy sál joǵary — 4 300 teńge.
Qaraǵandy men Qyzylordada qazynyń bir kelisi shamamen 4 500 teńgeden saýdalanady.
Osyndaı baǵa Qonaev qalasynda da baıqalyp otyr. Munda qazynyń kelisi 4 500 teńge turady. Keptirilgen túri — 5 000 teńge, al ystalǵan qazynyń baǵasy 9 000 teńgege deıin jetedi.
Almatyda qazynyń bir kelisi 4 500-4 700 teńgeden bastalady. Al ystalǵan ónim áldeqaıda qymbat. Onyń baǵasy 6 700 teńgeden bastalyp, 11 myń teńgege deıin barady.
Shymkentte soǵymǵa arnalǵan qazynyń bir kelisin 2 850 teńgeden satyp alýǵa bolady. Al kádimgi qazynyń baǵasy 4 560 teńgeden 8 900 teńgege deıin jetedi. Daıyn pisirilip, ystalǵan ónimniń quny budan da joǵary. Máselen, salmaǵy 400 gramm bolatyn bir qaptamasy 7 750 teńge turady, ıaǵnı bir kelisiniń baǵasy 19 375 teńgege shyǵady.
Tarazda qazyny danalap ta, salmaǵyna qaraı da satyp alýǵa bolady. Jergilikti turǵyndardyń aıtýynsha, baǵasy 3 500 teńgeden bastalatyn qazynyń sapasy qymbatyraq ónimderden tómendeý. Al 4 500 teńgege salmaǵy shamamen 600 gramm qazy alýǵa bolady. Halyq arasynda baǵasy 5 000 teńge, salmaǵy 800 gramm shamasyndaǵy ónimderge suranys kóp. Sondaı-aq bir danasy 6 000-7 000 teńgeden satylatyn qazy túrleri de bar. Alaıda olarǵa suranys azdaý. Al salmaǵyna qaraı satyp alǵanda sapaly qazynyń bir kelisi shamamen 5 000 teńgeden keledi.
Oralda jáne Kókshetaýda qazynyń bir kelisi 5 000 teńgeden bastalady. Atyraýda da baǵa osy shamalas. Qaladaǵy et dúkenderiniń basym bóliginde qazynyń bir kelisi shamamen 5 000 teńgeden satylady.
Pavlodarda qazynyń baǵasy 5 000 teńgeden bastalyp, 7 000 teńgege deıin jetedi.
Óskemende jáne Semeıde ulttyq delıkatestiń baǵasy shamalas. Eki qalada da qazynyń bir kelisi 5 000-5 500 teńge aralyǵynda satylady.
Astanada shıki qazynyń bir kelisin shamamen 5 000 teńgege satyp alýǵa bolady. Al daıyn pisirilgen nemese ystalǵan ónimniń baǵasy áldeqaıda joǵary — shamamen 13 000 teńge.
Qostanaıda kádimgi qazynyń bir kelisi maılylyǵyna qaraı 5 000-9 000 teńge aralyǵynda saýdalanady. Al ystalǵan qazynyń baǵasy — shamamen 11 myń teńge.
Taldyqorǵanda da 5 000 teńgege qazy tabýǵa bolady. Degenmen keıbir saýda oryndarynda onyń bir kelisi 7 000 teńgeden joǵary baǵaǵa usynylady.
Aqtóbede qazynyń bir kelisi 5 500-5 600 teńge turady.
Al qazynyń bastapqy baǵasy eń joǵary qalalardyń biri — Aqtaý. Munda ulttyq delıkatestiń bir kelisi 6 000-6 500 teńgeden satylady.
Osylaısha, Qazaqstan qalalarynyń basym bóliginde kádimgi qazynyń bir kelisi 4 500-5 500 teńge aralyǵynda eken. Onyń baǵasy óńirge ǵana emes, ettiń sapasy men maılylyǵyna, daıyndalý tásiline de baılanysty. Al daıyn ystalǵan jáne pisirilip ystalǵan qazynyń quny edáýir joǵary. Keıbir saýda oryndarynda bir kelisiniń baǵasy 13 myń teńgeden asady.
Eske salaıyq, buǵan deıin ár óńirdegi soǵym baǵasy týraly jazǵan edik.
