Qazaqstandaǵy elıtaly mektep oqýshylarynyń 8 paıyzy ǵana kedeı otbasynan shyqqan – Dúnıejúzilik bank

Dúnıejúzilik banktiń aǵa ekonomısi Samsý Rahardja Qazaqstandaǵy elıtaly mektepterdiń jalpy orta bilimniń sapaly bolýyna paıdasyn tıgize almaı otyrǵanyn aıtty, dep habarlaıdy QazAqparat tilshisi.

Dúnıejúzilik bank Qazaqstannyń memlekettik qarjysyna jasaǵan sholýyn tanystyrdy. Sholýdyń negizgi mazmunyn baıandaǵan Samsý Rahardja bilim berý salasyndaǵy keıbir jaǵymsyz tendentsııalarǵa toqtaldy.

«Qazaqstanda bilim berý salasyna bólingen aqshanyń kenet óskenin kórýge bolady. Bul óte jaqsy baǵyttaǵy damý. Óıtkeni bilim degen damýdyń óte mańyzdy aspektisi. Biraq bizge osy shyǵyndardy kóbeıte otyryp sapaly bilim alýǵa jaqsy jaǵdaı jasaý mańyzdy. Sapaly bilimge báriniń qoly jetý kerek.
Bul nege mańyzdy? Buǵan deıingi júıe «úshke» oqıtyndardyń qalyń nópiri men at tóbelindeı «ozattardy» qalyptastyrdy. Bul ozattardyń Nazarbaev zııatkerlik mektebiniń júıesinde oqýǵa basym múmkindigi bar. Pisa zertteýiniń qorytyndysyn kórgen shyǵarsyzdar. Oqýshylar suraqqa jaýap bermek túgil, onyń maǵynasyn túsinýge saýaty jetpegen. Jalpy bilim beretin mektepterdegi oqýshylardyń 67 paıyzy «saýatsyz» retinde kórsetilgen. Al úzdik mektepterdiń oqýshylary Ekonomıkalyq yntymaqtastyq jáne damý uıymynyń ortasha kórsetkishterinen jaqsy kórsetkish baıqatqan. Biraq bul jalpy mektepterdiń jaǵdaıyn kórsetpeıdi», - dedi ol.

Ekonomıst munyń bári ótken júıeden qalǵan «mura» ekenin atap, júıeni jaqsartý jaǵyn oılaý keregin aıtty.

«Eldegi elıtaly mektepterge baratyn oqýshylardyń 8 paıyzy ǵana halyqtyń tómengi qabatyndaǵy otbasynan shyqqan. ıAǵnı, áleýmettik mártebesi boıynsha tómengi qabatta turǵan 40 paıyzdyń ishinen shyqqan. Bul jerde biz elıtaly zııatkerlik mektepter jalpy oqýshylardyń bilimin sapaly etýge kómektese almaı otyrǵanyn kóremiz», - dedi Samsý Rahardja.