Qazaqstandaǵy BUU-nyń jańa Turaqty úılestirýshisi taǵaıyndaldy

ASTANA. KAZINFORM – Qazaqstan Úkimetiniń kelisimimen, BUU Bas hatshysy Antonıý Gýterrısh Mońǵolııa azamaty Sarango Radnaaragchany Qazaqstandaǵy BUU-nyń jańa Turaqty úılestirýshisi qyzmetine taǵaıyndady.

S.Radnaaragcha Eýropa men Ortalyq Azııadaǵy ornyqty damý salasynda 25 jyldyq mol tájirıbege ıe. Ol BUU Turaqty úılestirýshisi laýazymyna taǵaıyndalǵanǵa deıin BUU Eýropalyq ekonomıkalyq komıssııasynda (EEK BUU) Qorshaǵan orta máseleleri jónindegi óńirlik keńesshi qyzmetin atqardy. Bul qyzmette birneshe BUU eldik toptarynda EEK-tiń ókildik qyzmetin tıimdi qaıta uıymdastyrdy.

Sonymen qatar ol Eýropa men Ortalyq Azııadaǵy 17 elge arnalǵan EEK konventsııalaryn, normalary men standarttaryn oryndaýǵa baǵyttalǵan keńes berý jáne tehnıkalyq saraptama jumystaryn júrgizdi.

2014 jyly EEK BUU-ǵa kelgenge deıin S. Radnaaragcha ulttyq, óńirlik jáne halyqaralyq deńgeılerde ornyqty damý jáne tabıǵı resýrstardy basqarý salalarynda tabysty eńbek jolyn qalyptastyrdy. Ol Mońǵolııanyń Tabıǵat jáne qorshaǵan orta mınıstrliginde aǵa qyzmetker, keıin BUUDB, FAO, BUU Qorshaǵan orta baǵdarlamasy, Tabıǵatty qorǵaý jónindegi halyqaralyq odaq, GIZ jáne konsaltıngtik kompanııalarda túrli laýazymdardy atqarǵan. Onyń quzyretine saıasatty taldaý men ázirleý, transshekaralyq yntymaqtastyq, seriktestikterdi damytý, keńinen qatysýdy qamtamasyz ete otyryp tabıǵı resýrstardy basqarý, áleýetti arttyrý jáne baǵdarlamalardy basqarý kiredi.

S.Radnaaragcha Flınders ýnıversıtetiniń (Aýstralııa) Ekologııalyq menedjment salasyndaǵy magıstri dárejesine ıe.

Aıta keteıik, jeksenbi kúni BUU Qaýipsizdik Keńesi Irannyń suranysy boıynsha bul eldiń ıadrolyq nysandaryna jasalǵan sońǵy soqqylarǵa baılanysty shuǵyl otyrys ótkizdi.