Qazaqstandaǵy blekaýttyń sebebin arnaıy komıssııa tekseredi — KEGOC AQ
ASTANA. KAZINFORM – 14 tamyzda Qazaqstannyń birneshe óńirinde tehnologııalyq aqaýǵa baılanysty elektr qýaty úzilgen edi. Sońǵy málimetke saı, elde elektrmen jabdyqtaý tolyq qalpyna keltirildi. Bul týraly KEGOC AQ habarlady.
Kompanııanyń málimetinshe, 14 tamyzda saǵat 14:37-de Qyrǵyzstandaǵy Toqtaǵul sý elektr stantsııasynyń eki gıdrogeneratory ajyratyldy. Bul jaǵdaı Qazaqstannyń biryńǵaı elektr energetıkalyq júıesindegi «Soltústik–Shyǵys–Ońtústik» tranzıtine áser etti. Tranzıtke shamadan tys júkteme túsken. Sonyń saldarynan Qazaqstannyń Ońtústik aımaǵy energetıkalyq júıeden ajyratylǵan.
Elektr qýaty Almaty, Jambyl, Túrkistan, Qyzylorda jáne Jetisý oblystarynda úzildi. Sondaı-aq Qaraǵandy, Ulytaý jáne Abaı oblystary da jaryqsyz qalǵan.
KEGOC AQ málimetinshe, Qaraǵandy, Ulytaý jáne Abaı oblystarynda elektr qýaty saǵat 14:47-de qalpyna keldi.
Almaty men Jetisý oblystarynda jaryq saǵat 16:26-da berildi. Al Jambyl, Túrkistan jáne Qyzylorda oblystarynda elektrmen jabdyqtaý saǵat 16:34-te qaıta iske qosyldy.
Aqaý saldarynan Qazaqstannyń Ońtústik aımaǵy men Ortalyq Azııanyń birtutas energetıkalyq júıesi oqshaýlanǵan rejımge kóshti. KEGOC-tiń aldyn ala málimetinshe, buǵan Ortalyq Azııa energetıkalyq júıesinen kelgen qýattyń kúrt artýy sebep bolǵan.
Kompanııanyń resmı aqparatyna saı, tehnologııalyq aqaýdyń naqty sebebin arnaıy komıssııa anyqtaıdy.
Aıta keteıik, buǵan deıin QR Energetıka mınıstrligi jaǵdaıdyń baqylaýda ekenin habarlaǵan edi.
