Qazaqstandaǵy bıznes sýbektileriniń jartysyna jýyǵyn áıelder basqarady — Aıda Balaeva
ASTANA. KAZINFORM — Elordada QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen Global Businesswomen Council uıymynyń IV otyrysy ótip jatyr.
Jıynǵa QR Premer-mınıstriniń orynbasary — Mádenıet jáne aqparat mınıstri, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva quttyqtaýyn joldady.
Onyń aıtýynsha, Qazaqstanda áıelderdiń kásipkerlikpen aınalysýyna jáne ekonomıkalyq múmkindikterin keńeıtýge qolaıly jaǵdaı jasaý baǵytyndaǵy zańnama júıeli túrde jetildirilip keledi.
— Qazaqstan genderlik teńdik saıasatyn júıeli túrde júzege asyryp keledi. Konstıtýtsııa áıelder men erlerdiń teń quqyqtary men múmkindikterine kepildik beredi. Erler men áıelderdiń teń quqyqtary men teń múmkindikteriniń memlekettik kepildikteri týraly zań qoldanysta. Sondaı-aq 2035 jylǵa deıingi otbasylyq jáne genderlik saıasat tujyrymdamasy iske asyrylyp jatyr. Osy júıeli jumystyń nátıjesinde búginde áıelder ekonomıkada basshylyq oryndardy ıelenip otyr, — dedi Aıda Balaeva.
Eldegi Áıelder isteri jáne otbasylyq-demografııalyq saıasat jónindegi ulttyq komıssııa áıelderdiń ekonomıkalyq belsendiligin arttyrý máselesine erekshe mán beredi. Prezıdent tapsyrmasy boıynsha komıssııa áıelderdiń ekonomıkalyq múmkindikterin keńeıtýge baǵyttalǵan bastamalardy júzege asyryp keledi.
— Qazirgi tańda komıssııa áıelder kásipkerligin damytýǵa arnalǵan keshendi jospar ázirlep jatyr. Bul qujat memlekettik qoldaý sharalaryn, oqytý baǵdarlamalaryn, qarjylandyrý tetikterin jáne jańa ekonomıkalyq jaǵdaıda áıelderdiń múmkindikterin keńeıtýge baǵyttalǵan bastamalardy bir arnaǵa toǵystyrady, — dedi mınıstr.
A. Balaevanyń málimetinshe, búginde elimizde 1 mıllıonnan astam áıel kásipker tirkelgen. Áıelder shaǵyn jáne orta bıznes sýbektileriniń teń jartysyna jýyǵyna jetekshilik etedi, ári ShOB salasyndaǵy jumyspen qamtylǵandardyń 1/3 astamyn qamtamasyz etip otyr.
Sonymen birge, áıelder kásipkerligi negizinen qyzmet kórsetý salasynda shoǵyrlanǵan. Al iri bıznes qurylymdaryndaǵy áıelderdiń úlesi áli de jetkiliksiz kúıinde qalyp otyr.
Aıta keteıik, elimizde ekologııalyq jobalardaǵy áıelder úlesi artyp keledi.
