Qazaqstandaǵy bankaralyq QR-tólem júıesine 6 bank qosyldy
ALMATY. KAZINFORM – Búgin elimizde biryńǵaı bankaralyq QR-tólem júıesi resmı túrde iske qosyldy.
Bul týraly Almatyda ótken Central Asia Fintech Summit forýmy aıasyndaǵy baspasóz máslıhatynda QR Ulttyq bankiniń tóraǵasy Tımýr Súleımenov habarlady.
– Búgin biz úlken ulttyq joba – biryńǵaı QR júıesin resmı túrde iske qostyq. Bul bastama, birinshiden, qarjy qyzmetterin qoldanatyn qarapaıym adamdardyń ómirin jeńildetedi. Ekinshiden, jalpy júıeniń tıimdiligin arttyrady. Úshinshiden, Ortalyq Azııa aımaǵyndaǵy kóshbasshylyǵymyzdy bekitedi. Biz árdaıym tehnologııa, tsıfrlandyrý salasynda aldyńǵy qatarda bolýymyz kerek, - dedi ol.
Qazaqstannyń ulttyq tólem korporatsııasy basqarmasynyń tóraıymy Janar Samaeva ótken aıda bankaralyq QR júıesiniń pılottyq nusqasy iske qosylǵanyn atap ótti. Ol seriktes bankterge bastamany qoldaǵany úshin rızashylyǵyn bildirdi. Aıtýynsha, biryńǵaı QR qazirdiń ózinde birneshe mıllıon paıdalanýshyǵa qoljetimdi. Júıege Bank TsentrKredıt, Freedom Bank, Halyk Bank, Altyn Bank, RBK Bank jáne Home Credit Bank qosylǵan.
– Jalpy jospar boıynsha, servıs barlyq óńir men saýda kásiporyndaryn qamtıdy. Jyl sońyna deıin taǵy úsh bank qosylýy múmkin. Bul – kúrdeli ári uzaq jumys. 2026 jyly júıeni tolyq kólemde iske qosýdy josparlap otyrmyz, - dedi Janar Samaeva.
Eske salaıyq, byltyr Almatyda barlyq bank úshin biryńǵaı QR kod júıesi tanystyryldy.