Qazaqstandaǵy balalar hırýrgııasynyń negizin qalaýshy Kamal Ormantaev ómirden ozdy
ALMATY. KAZINFORM – Elimizdegi balalar hırýrgııasynyń negizin qalaýshy, akademık, Memlekettik syılyqtyń laýreaty Kamal Ormantaev 88 jasqa qaraǵan shaǵynda ómirden ozdy.
Qaraly habardy S. J.Asfendııarov atyndaǵy Qazaq ulttyq medıtsına ýnıversıtetiniń baspasóz qyzmeti jetkizdi.
Qazaqstannyń balalar hırýrgııasy, pedıatrııa, travmatologııa men anestezıologııasynyń negizin qalaýshy Kamal Ormantaev 1936 jyly 11 qyrkúıekte Qyzylorda oblysynyń Qarmaqshy aýdanynda dúnıege kelgen.
Joǵary bilikti balalar hırýrgi Kamal Ormantaev kókirek qýysy, ókpe, óńesh, qursau qýysy, bas súıek pen búırek múshelerine jıyrma tórt myńǵa jýyq kúrdeli ota jasaǵan.
Kamal Ormantaev 1953 jyly Almaty memlekettik medıtsına ınstıtýtynyń pedıatrııa fakýltetine túsedi. 1959 jyly Almaty memlekettik medıtsına ınstıtýtynyń balalar hırýrgııasy kafedrasynyń klınıkalyq ordınatýraǵa túsip, 1961 jyly klınıkalyq ordınatýrany jáne 1965 jyly kandıdattyq dıssertatsııany qorǵap gospıtaldik hırýrgııa kafedrasynyń aspırantýrasyn támamdaıdy. Sodan soń Kamal Sárýaruly joǵary oqý ornynda balalar hırýrgııasy kafedrasynyń assıstenti bolyp eńbek jolyn bastaıdy.
1971 jyly KSRO MǴA Pedıatrııa Ǵylymı-zertteý ınstıtýtynda doktorantýrany bitirgennen soń doktorlyq dıssertatsııany qorǵap, oǵan professor ataǵy berildi.
1968 jyldan bastap 2012 jylǵa deıin Kamal Sárýaruly Ormantaev balalar hırýrgııasy kafedrasyn basqardy. Kafedrany basqarǵan 43 jyldyń ishinde bilikti ustazdyń qolynan 1500-nan astam dáriger bolashaqqa joldama alyp, kóbisi oblysaralyq balalar hırýrgııasy boıynsha ulttyq ortalyqtardyń jetekshileri, kafedra meńgerýshileri atandy. Akademık Kamal Ormantaev joǵary bilikti mamandar daıyndaýda hırýrgtardyń kásibı jan-jaqty damýyn, ǵylymnyń damýyna jáne onyń halyqaralyq deńgeıge kóterilýine úlken kóńil bóldi.
Kamal Ormantaev 320-dan asa ǵylymı jumystardyń, balalar hırýrgııasy boıynsha keńestik nusqaýlardaǵy 9 taraýdyń jáne 9 monografııanyǵ avtory.
Dáriger II dárejeli «Dostyq», III dárejeli «Barys» jáne «Parasat» ordenderimen marapattalǵan.