Baǵaly qaǵazdar naryǵy: aktsııalar men oblıgatsııalar qyrkúıekte belsendi ósken
ASTANA. KAZINFORM — 2025 jylǵy qyrkúıekte Qazaqstan qor bırjasyndaǵy (KASE) aktsııalar men oblıgatsııalar naryǵy ósim kórsetti. Aktsııalar naryǵyn kapıtaldandyrý 40,2 trln teńgege jetip, jyl basynan beri 22,3%-ǵa ósti. Bul KASE ındeksiniń ósýimen, sondaı-aq «QazMunaıGaz» (+9,2%) jáne «Qazatomónerkásip» (+14,3%) aktsııalarynyń baǵasynyń kóterilýimen baılanysty. Bul týraly Qarjy naryǵyn retteý jáne damytý agenttigi málim etti.
KASE ındeksi qyrkúıekte 2,2%-ǵa ósti jáne 7 149,42 tarmaqqa jetti. Aktsııalarmen saýda kólemi 27 mlrd teńgege jetip, bir aıda 9%-ǵa artty. Saýda kóbinese «Eır Astana» men «Bank TsentrKredıt» aktsııalarynyń belsendiligi esebinen ósti.
Agenttiktiń málimetinshe, «KASE Global» sektorynda sheteldik 59 emıtenttiń 18 ETF jáne 47 aktsııasy saýdalanady. Bul sektordaǵy saýda kólemi Intel, NVIDIA jáne keıbir ETF aktsııalarynyń belsendi saýdasy arqasynda 23,4%-ǵa artty, qyrkúıek aıynda 21,9 mlrd teńge boldy.
Korporatıvtik oblıgatsııalar naryǵy da ósim kórsetti: 643 shyǵarylym boıynsha 141 emıtenttiń oblıgatsııalary saýdalandy, saýda kólemi bir aıda 35%-ǵa ósip, 670,8 mlrd teńgege jetti. Al korporatıvtik oblıgatsııalar naryǵynyń jalpy kólemi 14,4 trln teńgeni qurady.
Memlekettik baǵaly qaǵazdar naryǵy 30,7 trln teńgege jetip, jyl basynan beri 13,5%-ǵa ósti. Degenmen, memlekettik baǵaly qaǵazdarmen saýda kólemi qyrkúıekte 22,3%-ǵa azaıyp, 614,5 mlrd teńgeni qurady.
Ujymdyq ınvestıtsııalaý naryǵynda 58 ınvestıtsııalyq paı qory jumys isteıdi. Qyrkúıek aıynda paı qorlarynyń basqarýdaǵy aktıvteri 396,4 mlrd teńgege jetip, bir aıda 4%-ǵa ósti. Baǵaly qaǵazdar portfeli osy aktıvterdiń 84%-yn quraıdy.
Qor naryǵynyń kásibı qatysýshylary — brokerler, dılerler, ınvestıtsııalyq basqarýshylar men ınfraqurylymdyq uıymdar belsendi jumys isteýde. 2025 jylǵy qyrkúıekte ortalyq depozıtarııdegi shottardyń sany 4,62 mln-ǵa jetip, jyl basynan beri 3,6%-ǵa ósti.
Qor naryǵyna qatysýshylardyń aktıvteri 593,3 mlrd teńgeni qurady. Mindettemeler REPO operatsııalarynyń azaıýyna baılanysty 150,9 mlrd teńgege qysqardy, al menshikti kapıtal 442,4 mlrd teńgege jetip, 2,1%-ǵa ósti.
Eske sala keteıik, buǵan deıin qor bırjasynyń resmı tizimine «Boryshtyq baǵaly qaǵazdarǵa arnalǵan býfer» segmenti engiziletinin jazǵan edik.